Senegalese international Mendy hi Chelsea first choice goalkeeper niin Chelsea chuan contract thar ziahpui tumin an be mek. Mendy hian 2020 khan kum 5 atan Rennes atangin Chelsea a zawm a, kum 3 a la nei chungin chelh an duh. 

Season liam ta khan Edouard hian match 49-ah clean sheet 23 a nei a, season chhung zawngin goal 40 chiah a chhuah. Edouard Mendy hian kum 3 zet contract ala nei chungin Chelsea hian chelh rih an la duh a ni.

Senegalese hian Chelsea a luh tirhin first choice a chang phak bik lo va, Kepa Arrizabalaga hneh chhuh tumin theih tawp a chhuah a, tunah chuan a luahlan tawh a ni. A season hman hmasak berah Chelsea chu Champions League a champion pui a, clean sheet pakua a nei nghe nghe. 

A chetthat em vangin UEFA leh FIFA chuan 2021-a 'goalkeeper of the year' ah an thlang a, African zingah hetiang chawimawina hlawh chhuak hmasa ber a ni. Hemi kum hian game 51-ah goal 34 chiah a chhuah a, clean sheet 27 a nei thei a ni. 

Thomas Tuchel-a squad-ah chuan a hlawh chhe pawl tak niin Edouard Mendy hian kar khatah £60,000 chiah a hlawh phak a, Kepa erawh chuan kar khatah £150,000 zet a hlawh thung. Manchester City keeper Ederson leh Liverpool keeper Alisson te phei chu a phak lo nasa hle a ni. Manchester United goal keeper David de Gea hi khawvel goalkeeper zinga hlawh hnem ber niin kar khatah £375,000 a hlawh a ni.