Aizawl; Tun lai hian cherna damdawi leh ngona damdawi nia sawi hman nasat vangin thalaite zingah harsatna tawk an tam hle niin FDA thawktute chuan an sawi.

ZALEN-in a kawmnaah Food & Drug Administration, Directorate of Health Services thawktute chuan Zoram Medical College (ZMC)-a  ‘Adverse Drugs Reaction Monitoring Centre – Pharmacovigilance Cell’ chuan tun laia damdawi an fak te hman avanga harsatna nei report tun hnaiah an dawng nual a, heng mite hi social media kaltlanga an hmuh cherna/ngona damdawi lo hmangtute an ni a, an insawiselna tlangpui chu lungphu rang (tachycardia), taksa chauh ngawih ngawihna (fatigue), chiaina (light headedness), muthilh theih lohna (insomnia), ning ngawih ngawiha awm (stress) leh chaw pai nuam lo (indigestion/ bloating) te an ni tih an sawi.

FDA thawkte chuan Lishou (cherna damdawi), ngona damdawi (Glutathione), tha na damdawi (Cindella Infusion) te chu doctor thiamte thurawn tel lo chuan hmang lo turin mipuite an ngen tih an sawi a. “Heng damdawite hi fimkhur taka hman ngai a ni a. Ngona damdawi injection-te pawh mi thiamte kaihhruaina hnuaiah training tha taka neih hnuah tih chauh tur a nih laiin mi thenkhat chuan beauty parlour-ah an in-jection mai a. Heng injection zingah harsatna tawka skin doctor pan an tam hle a ni,” an ti a. Damdawi reng reng advertisement hmanga fak phal a ni lo tih an sawi bawk.

Mizo tualchhuak damdawi chu finfiahna a awm loh vangin license an pe thei lo tih sawi bawkin FDA thawk te chuan, "Mizo damdawi te hi zirchianna tak tak a awm lo a, damdawi siamchhuak tur chuan tam tham deuh a awm a ngai a. Chubakah damdawi a chakna awm te chiang taka tarlangin siam hun, a chakna leh a thih hun (expiry date) te chiang taka tarlan a ngai a. Mizo tualchhuak damdawi zingah hetianga ti thei an awm loh avangin license pek theih an ni lo a ni," an ti. FDA thawk te chuan  Mizo tualchhuak damdawi siam zingah label te lo bel a, advertisement hmanga damdawi thatzia lo fak chiam te an awm tih sawi bawkin heng mite hi ti tawh lo turin an hriattir niin an sawi bawk.