ZALEN June 13, 2025 : The Morning Bell-in a tarlan danin Kum 26 mi Lamnunthem Singson, Air India thlawhnaa crew member, Ahmedabad-a thlawhna tla a tel chuan, Nilaini zan khan a nu, Limneikim hnenah a tuk zinga duty tura in-report a ngaih avangin mut a duh thu a hrilh a, phone kaltlanga an tawngtai dun hnuah an inthlah.

Lamnunthem hi a nu hmeithai fanu neihchhun niin unuapa pathum a nei a, anni chhung hi chi leh chi intihbuaina avanga Imphal-a an chenna chhuahsana Kangpoki district-a mi In luaha awm niin sawi a ni.

"Kan chanchinthar hriat hian min tihrilhhai tak zet a ni. A nu phei hi chu a thawng a, chaw pawh a ei lo," tiin mitthi cousin Lun Kipgen chuan TMB a hrilh.

"AIR India chuan nimin khan min rawn bia a, a taksa hi an la hre thei lo a. Amaherawhchu mi pakhat bak an him lo tih thu erawh kan dawng," a ti.

"A nu a biak hnuhnunber chu Nilaini zan dar 11 khan a ni. A nu hi London-a an kal tur thu a hrilh a, zingkara in-report ngai an nih avangin mut a duh thu a hrilh a. Hemi hnu hian Singson leh a nu hi phone kaltlangin an tawngtai rual a ni," tiin Kipgen chuan, "Anni nufa hian zan tin mut dawna tawngtai rual hi an tih dan hrim hrim a ni," a ti bawk

TMB-in a ziah dan chuan Lamnunthem hi an unaua hnathawk awmchhun a ni a, an upa ber hi damlo inenkawl lai niin Guwahati-a medical treatment ti lai a ni a, ani hian Ahmedabad a pan tawh a, a unaupa pakhat leh an cousin te pawhin tukin khan Ahmedabad panin Dimapur an chhuahsan bawk a ni.