Aizawl: Mizoramah tun hnai ni 42 kalta chhung khan chhiatna lian tham, chetsualna/vanduaina thlenga mi pakhat aia tam thihna thlengah mi 31-in nunna an chân a. Chung zinga pakhat chu hmeichhia a ni.

ZALEN-in a chhinchhiah chinah ni 42 liam ta chhunga chhiatna lian thama thi mi 25-te chu Maudarh quarry chima thi mi 12 leh Tuirial Airfield venga tanker kang vanga thi mi 13 an ni a, current man vanga thi leh bike chesuala thi mi pathum ve ve an awm bawk.

Lawngtlai district-a Rulkual khuaah October 14 chhun khan electric current man vangin mi pathum an thi a, mi pahnih na takin an hliam a. October 29 tlai dar 2:30 vel khan Tuirial Airfield peng bulah tuialhthei phur chesualin zan dar 6 rik hma deuhin a kang a, a hmunah mi pali an kang hlum a, hliam tuar damdawi ina enkawl mi pakua an boral leh a, tanker kang thite hi mi 13 an tling tawh a ni.

November 10, 2022 tlai dar 3 vel khan Champhai leilet kawngpuiah bike a chesual a, mi pathum chuangin an vaiin an thi a; Champhai, Khuangphah leh New Champhai mi an ni.

November 14 tlai khan Maudarh khuaa ABCI lung lakna hmun (quarry) chu chimah mi 12 an thi a, boralte hi an vaiin hnam dang vek an ni a. He thu ziahlai thleng hian thi ruang pakhat hmuh a la ni lo a, ngawrh taka zawn chhunzawm mek a ni.