ZALEN February 10, 2025 : Chhandamna Kohhran (Salvation Church of India) chuan ni 8 & 9.2.2025 khan Kohhran Bial Inkhawmpui Area General Assembly hmangin ni 8.2.2025 khan Area tinah rorel inkhawm hman a ni.

Area General Assembly hi Aizawl Area chuan Chawnpui Kohhran-ah hmangin, Kolasib Area chuan Hmar veng Kohhran-ah an hmang a. Lunglei Area lamah chuan Sethlun Kohhran-ah hman a ni thung. Kohhran inrelbawlna, rawngbawlna tur bakah Kohhran pawipang chi hrang hrang relin hun an hmang a ni.

9.2.2025, Pathianni chawhma inkhawmah Aizawl Area chhunga Aizawl Kohhran leh Aizawl East Kohhran atangin Upa atan mi pali nemnghehna hun Rev. Dr. R.Lalsangzuala, Aizawl South Area Pastor chuan a hmang.

Pathianni chawhma vek khan Sawleng Kohhran-ah Home Missionary dahnghehna hun hmangin Upa Laltlanthanga, Chhandamna Kohhran Vice President chuan Home Missionary thar Tv. Immanuel V.L. Thlamuanpuia, B.Th., M.Div. dahnghehna hun hi a hmang a. Upa Dr.H.Lianzela, Chhandamna Kohhran President-in thutawi a sawi. He hunah hian Rev.Lalnunsîama Khiangte, Executive Secretary, Fundamental Baptist Church of Mizoram chuan Pathian thuchah a sawi thung a ni.