ZALEN July 4, 2025 : Mizoram Pradesh Congress Committee chuan vawiin khan Vanapa Hall kawt-ah 'India Danpui Humhimna leh Mizoram Mipui Thlavang Hauhna' hun an hmang a, Bhavan thlenga kawhzawhna an nei bawk. He hun hi MPCC Treasurer Dr. Lalmalsawma Nghaka chuan a kaihruai a ni.

MPCC General Secretary John Siamkunga, PAC member chuan thu sawiin, "BJP hian Indira Gandhi hova Emergency an puang kha India Constitution thahna ni 'Samvidhan Hatya Diwas' tiin an kova, a lawmna hun pawh Mizoramah ngei pawh an hmang anih kha. BJP hian engtin nge Constitution thahna tiin engtin nge an sawi theih zawk? India ram hi Socialist pattern in kan kal a, Socialist pattern a kan kal vang hian Ni za inhlawhna te, food security thleng hian kan dawn phah a ni. Sakhaw tih bik nei lo Secular ram kan ni a, chuvang chuan kan zavaiin kan sakhua theuh zalen takin kan be thei a ni."

"CAA te kha amend phal loh a ni a, mahse an amend pui tlat a. Christian te phei chu foreign sakhua an ti a, min telh duh lo a ni. Hmanlai a lo awm tawh Muslim pawh an telh duh lo a ni. India ram Hitdutva a siam duhtu chu RSS te an ni a, anni hian Kriatian te hi min nekchep reng a ni. Ti hian zawi zawiin min nekchep reng ang a, an duh chu engtikah emaw chuan an ti dawn tho tho a ni." 

"Rahul Gandhi thubuai an siamsakna National Herald Case hi party thil pawh a ni lova, a pu ta an chhawm a ni. He thil party pawn lam pang thil, diklo pawh awm lo hmangin an bei zui chiam mai a ni," a ti. 

ZPM sawrkar chungchang sawiin,"Tunah hian GST khawn a tlahniam zel a, hetiang reng chuan sawrkar hi a kal reng thei dawn lo. An tih theih awmchhun chu Central-a BJP sawrkar tlawn a ni a, BJP hnuaiah hian an intulut dawn tho tho," tiin a sawi.

PAC member John Rotluangliana, Ex-Minister pawhin, "Vawiin ni ang em em a sum lengvak tlem hi a la awm lo. Ram chhiah an ti to a, buhfai man an ti to a, petrol leh diesel man an ti to bawk a, chuti chung chuan sum lengvak a tlem em avangin mipui an harsa a ni," a ti.

"ZPM hotute hian lirthei man tovah kan chuang ve lovang an ti a, mahse a man to to an lei leh a, an sawi ang hian an awm lo lutuk hi an harh a ngai a ni.

"ZPM sawrkarah hian a mitha tha hi an chuang a, PWD minister atan hian Pu Lalmuanpuia Punte leh Pu TBCA te hi awm se kan zia zawk ang."

"ZPM sawrkar hian chhiah tihsan theih zawng zawng an ti sang a. Sahuana zawngte en man thlengin an ti sang."

"Airport chungchangah pawh hian kan CM hian Airforce ho in an offer that thu a sawi thin a, an buaipui khawp mai. MNF pawh khan Kamrula hovin an buaipui khawp mai. Congress in Airport khu kan sak a ni a, a laih tan dawn khan party hrang hrang sawmin tawngtaiin bul kan tan a, khatah khan MNF kha an tel ve duh lo a ni."

"MNF future chu 'Buai' a ni. An President hi thlak dawn se, an buai dawn si a. Thlak lo pawh ni se an buai tho si a. Buai bak hmabak an nei lo.

"MNF khan Airport Cute ber kan siam dawn an ti a, Kamrula hovin an han che tak tak a, India rama Airport liang hniam ber an siam. Kolkata Airport te khu a liang a sang teh a nia," a ti bawk.