ZALEN, Apr. 15, 2026: India rama mihring awm zat chhiarpui kalpui mekah thenawm state leh ram buaina avanga Mizorama tlanchhiaa inbengbel mekte pawh chhiar tel vek an ni dawn.

Nilainia Mizorama chhiarpui kalpui mektuten Aizawl Press Club-a thuthar lakhawmtute an kawmnaah Manipur leh Myanmar-a buaina chhuak avanga raltlan mek, awm nghette chu chhiar tel vek an ni dawn tih an sawi.

“Chhiarpui hian India khua leh tui nihna (citizenship) a khawih lo va, ram chhunga mihring awm zat chhiarna a nih avangin awm nghette chu chhiar vek an ni ang a, relief camp-a mite pawh an tel vek dawn,” an ti a. “India-ah awmin tui, electric leh thil dang kan hman ang min hmanpui vek avangin chhiar tel vek tur an ni,” an ti.

Chhiartuten mihring nihna an chhinchhiahna hrang hrangte chu thup (confidential) a ni dawn a, a zat (figure) chauh chhiar tur a nih thu an sawi a. Chhiarpuia mi dinhmun lak khawm (data) hi sorkar tan a mipui mila policy siamna atan a tangkai tih an sawi bawk.

Press Information Bureau (PIB), Aizawl; Directorate of Census Operations, Mizoram leh chhiarpuia Mizorama nodal department, GAD hotuten thuthar lakhawmtute an kawmnaah hian an hotu, Vinod P Kavle, IAS chuan mahni inziah lutna (self numeration) kalpui, Ningania a hun zo turah Mizoramah mi 10,400 vel an inziak lut tawh a, state 15-a a ruala kalpui mekah inziak lut tam pawl a nih thu a sawi.

Mahnia inziah luh hun a tawp hnuah hian in April 17 atang hian House Listing & Housing Census neih a ni dawn a, in tinah thawktute kalin in dinhmun an zawt dawn a, mahnia inziak lut tawhte pawh tlawh chhuakin identity card en fiah a ni ang a, zawhna 34 zawtin chhinchhiah a ni ang a, an kal tawhna in hi rawnga chhinchhiah zui a ni ang.

February, 2027 atangin mihring inchhiar kalpui zui a ni leh bawk ang.