ZALEN, June 12, 2024; Mizoram a ruahsur nasa vanga chhiatna tawkte tanpuina tur pawisa fai Central YMA kutah an hlan.

Shillong Assam Regiment Centre( ARC), a Mizo hnahthlak sipai awm ten ‘ Mizo Insuihkhawm Pawl’ tiin Mizorama ruah sur nasa avanga chhiattawkte tanpuinan Central YMA ah Rs.90,280/- an hlan.

Mizo Insuihkhawm ah hian Zofa unau hrang hrang - Hmar, Zomi Inkuan, Kuki Chate Kiloikham (KCK) te an tel.

Nimin (11.6.2024) vek khan Manipur Group YMA hruaitute chuan tunhnaia Mizorama Khuarel Chhiatna tawkte tanpui nana an group huam chhunga vehbur an khawn atangin Rs. 4,07,630 chu Central YMA hruaitute hnenah an hlan bawk.

Manipur Group YMA hruaitute hian hemi pual thova Zomi Youth Association & Zomi Mother Association te vehbur khawn tlingkhawm Rs. 3,04,321/- leh Zou Youth Association te vehbur khawn Rs. 1,97,847/- chu an aiawhin Central YMA hruaitute hnenah an hlan nghal bawk.