ZALEN August 3, 2025: Chhinga Veng Local Council leh Branch YMA tangkawp chuan Zirtawpni zan khan an veng chhunga Myanmar raltlan an ko khawm a. Chhungkaw pa ber ID (Burma) laksak an kawl tha a, veng chhung an chhuahsan dawn chauhin an pek kir leh an ni ang. 

Raltlante hi chhungkaw pa ber theuh kohkhawm niin mi 140 an kal a. Chhinga Veng Local Council Chairman TBC Lalchawiliana chuan raltlante chu an veng chhungah thlamuang taka awm tur leh harsatna an tawk a nih chuan theihtawpa puih an inhuam thu a sawi a. Raltlan zingah mi fel tak awm mah se mi tha lo, ruihhlo tawlh ching an awm thin chuan ram a tibuai thin tih sawiin, an veng chhunga raltlante chuan ti ve lo va, dopui zawk turin a chah a. Ram leh khawtlang duh dan chu an awm chhunga zawm zel turin a fuih bawk.  

Chhinga Veng YMA President C.Laldinsanga pawhin ram buai avanga raltlan, an veng chhunga awmte chu inluah danah veng chhunga awm sate hnawtchhuaka a aia to a luah dil an awm thin chu ti ve lo tur te, voter ID dik lo taka nei lo tur tein a fuih a. Tun hnaiah hnam bil leh chi bil anga intel hrang te, inkhawm hrangte an awm chu tha lo a tih thu sawiin, kohhran an bel a nih pawhin heta kohhran awm sa bel ve mai turin a fuih bawk.