June 14, 2022; Lalpa Kohhran Thar, Lalram Kawngpui Zawhtute hruaitu ber, 'Khawvela chhungkaw lian ber' dintu an tih thin, Zionnghaka (Ziona) thih champha vawi 1 na chu vawiin khan Baktawng a Chhuanthar, Tlangnuam-ah Chhuanthar kohhran mipuite'n awmni khamin, ruai nen an hmang.

Chhuanthar kohhran hruaitute hnen atanga ZALEN thudawn danin, vawiin chawhma dar 10 atanga dar 12 thleng khan Chhuanthar stadium ah an hotupa ber boral ta Ziona pualin hun an hmang a, amah zahna chibai bukna te neiin, zai leh lam tein hun an hmang a, tlai lamah chawhlui an kil bawk a ni.

Chhuanthar kohhran hruaitute chuan an hotupa ber boral champha vawi 1 na pual a hun an hmang ta mai chu lunglenthak an ti hle tih an sawi a, a piancham July ni 21 ah pawh kum danga an lo hman tawh thin angin, ropui taka hun hman an tum thu an sawi.

Kum 1944, July ni 21 a piang Ziona hi zunthlum leh thisen sang vangin, Trinity Hospital Aizawl ah June ni 13, 2021 tlai lam dar 3 vel khan a boral a, a boral hian kum 77 mi a ni. Chhan hrang hrang vangin, June ni 17, 2021 ah vui a ni a, a ruang chu 'Chhuanthar Hmun Thianghlim' ah zalh a ni.

Ziona hi a pu atanga Zoram hriat hlawh an ni a, a pu chu Khuangtuaha niin, a pa chu Chana a ni. Chhuanthar, Tlangnuam ah an awmkhawm a, member 3000 bawr vel an tling nia hriat a ni. An inlungrualna leh an inpumkhatna te, an taimakna te chu mi hriat an hlawhna pakhat a ni a, in chhung bungrua leh bel an siamte chu tun thlenga an hmingthanpui a ni.

Ziona hian nupui 39 a nei a, a boral thleng khan pahnih a sun a, fa 86 (mipa 40 leh hmeichhia 46) a nei nia hriat a ni a, a nupui fanaute leh a tute nen, mi 200 bawr vel in khatah an cheng a, an in chu 'Chhuan Thar Run' tih a ni. Hei hi khawvel huap pawh a hriat an hlawhna a ni a, ramchhung leh pawn media te ngaihven tling niin, an awmna hmun pawh tun thlengin an la tlawh fo thin.