Aizawl June 26, 2023 : June 22, 2023 khan General Administration Department (GAD) chuan Ainawn Venga sawrkar Quarters Type I, II, III leh IV luahtu chhungkaw za chuang te chu ni 60 chhung ngeia an chenna In chhuahsan turin thuchhuah an siam. He thuchhuak hi chhungkaw tam tak tan harsatna thlen thei a nih avangin MNF sawrkar chu ngaihtuah nawn leh turin Congress party chuan an ti.

June 18, 2023-a Council of Ministers thukhawm (meeting) chuan Ainawn veng (Gov’t Complex veng tia hriat thin) a sawrkar building/quarters te chu chhiatrupna thleng thei pumpelh nan building te tihruah a, thiah nghal nise tiin thutlukna a siam a. He thuchhuak bawhzui hian June 22, 2023 khan General Administration Department (GAD) chuan thuchhuah hi a siam a ni. 

Sawrkar lehkha atanga a lan danin Ainawn venga sawrkar Quarters luah mektute hi chhungkaw 161 vel an ni a. Congress thuchhuah chuan heng chhungkua te hian hmun dangah chenna In an neih loh avangin an theih ang angin an sum leh pai sengin an Quarters luahte hi an siamtha (repair) ve thin, an ti a, sawrkar phalna thlapa luahtute chuan thlatin sawrkarah House Rent Allowance (HRA) an chawi thin an ti bawk.

Congress chuan Mizoram sawrkar thupek avang hian Ainawn venga sawrkar quarters luahtu chhungkaw za chuang te chuan ni 60 chhung ngeiin chenna tur hmun dang an zawn a ngai dawn a. Kum tam tak chhung an lo chen tawhna veng atanga hnawhchhuah an ni tur leh Veng dangah pawh In luah tur a van avangin Chhungkaw tam tak chu sawrkar thuchhuak avang hian lungngaiin an kun mek a ni, an ti.

Congress party chuan heng sawrkar quarters te hi chenna atana him lo a nih pawhin a tahtawlin siam that hna sawrkarin a sum neih dan milin a thawk mai turah an ngaih thu leh quarters te hi sak that a nih pawhin sak zawh a nih hunah tuna luahtute hian anmahni puala In an la nei lo a nih chuan Ainawn venga sawrkar quarters tharte an luah leh ngei theih nan sawrkarin intiamkamna siam se an ti bawk.