Aizawl; Sum peipunna nia sawi, a hunlaia ‘kar khat bank’ an tih, ‘Chiahpuam’ thubuaiah tun thlengin mi 33 chargesheet an ni tawh a, a tira pawisa man (seize) chu State Bank of India (SBI), Main Branch, Aizawlah deposit niin, tun dinhmunah a pung nen Rs. 18,13,77,625 a tling khawm tawh.

ZALEN-in Chiahpuam chungchang RTI hmanga a zawhna, Police Headquarters SPIO-in a chhan danin a tira pawisa mante chu SP Office, Aizawlin SBI, Main Branch, Aizawlah a deposit a, a hnu lamah DC Office, Aizawlah Chiahpuam kaihhnawih pawisa zawng zawng leh pass book hlan a ni a. Depositor-te hnena pek chhuah tumna a awm leh awm loh chu Mizoram police kuta awm a nih loh avangin an hre lo.

RTI chhannaa a lan danin Chiahpuam chungchangah August 30, 2008 khan Aizawl PS-ah thubuai ziah luh niin, January 29, 2009-ah Bawngkawn PS-ah ziah luh a ni bawk a, Kulikawn PS-ah February 4, 2009-ah thubuai ziah luh a ni bawk.

Heng thubuai ziah luh bawhzuina kal zelah Chiahpuam nia hriat tak chu lo irh chhuakin a hnarkaitute man chhuah an ni a, tun thlengin mi 33 charge sheet an ni tawh.

Chiahpuam chungchangah vek hian Aizawl DC Office, SPIO chuan RTI hmanga ZALEN zawhna chhangin tun thlenga pawisa tling khawm tawh zat chu Rs. 18,13,77,625 a ni tih tar langin, chung sumte chu fix deposit-in SBI, Aizawl Main Branch-ah dah a nih thu leh DC office atanga depositor-te hnena sem tumna hriat a nih loh thu a tar lang.

SPIO chuan court thutlukna angin Aizawl SP atangin Chiahpuam leh a kaihhnawih thilte chu DC office-ah hlan chhawn a ni tih a tar lang bawk.

Hetihlai hian Chiahpuam sumah an ta tela ngai (claim-tu) zat hi a zat chiah hriat a har a, mi 5,000 chuang an tling nia thudawn a ni.