ZALEN February 7, 2025 : Mizo Students’ Union : General Headquarters hruaitute leh College hrang hrang SU Leaders te chuan vawiin khan Chief Minister a Pisa-ah an hmu a. College Study Tour Fund leh College Development fund chungchang te an thlen.

MSU hruaitute chuan Chief Minister hnenah hian, sawrkarin kumtina Mizoram Budget a a dah thin College Study Tour Fund Cheng nuai 50 chuan Mizoram puma College zirlai mi 13553 te a huap zawh tawh loh lutuk avangin, cheng nuai150-a budget a tihpun a nih theih nana hmalakpui turin an ngen.

MSU chuan kumtin College zirlaite admission atanga Sawrkarin pawisa a lak thin zirlai pakhat zelah tuition fee Rs. 1200, Admission fee Rs. 120 leh Hostel Admission Fee Rs. 600 a lak thin chu College lamten a tul anga an hman theih tura dahlet sak tawh turin an thlen bawk a ni.

MSU chuan zirlaite ha taka a lo dawnsawn naah Chief Minister Lalduhoma chungah lawmthu an sawi a. An dilna thlen te hi an vil zui zel dawn tih an sawi.