ZALEN January 30, 2026: Chief Minister Lalduhoma chuan vawiin khan Buhchangphaia SSB Agro ten Kuhva sawngbawlna khawl an bun chu a hawng. Kuhva a ruka tawlh an dona kawngah an thawk tha tawk tih a lanna chuan Kuhva chingtu ten an hralh that ber kum an thleng hian a ti lang a ti.

A hawnna inkhawmah thu a sawiinah Chief Minister chuan, "Department chhinchhiah danin Mizoramah kuhva huan hi Hectare 30,000 vel a zau a awm mek a, nikum 2024-2025 chhung khan Mizoram puma Kuhva tharchhuah zat hi Quintal 2,00,000 vel nia chhut a ni a. Eizawnna ngelnghet leh hlawk tak a nih avangin sawrkar chuan Kuhva phun belh zel hi kan support-a, Handholding Scheme leh CM Special Package hnuaiahte dilna thehluh theih a ni," a ti.

Kuhva rah do kawngah an hlawhtlin thu sawiin Chief Minister chuan, "Kum thum kum li kal ta vel atang khan dan lova Kuhva ro tawlh rukna a nasat avangin Kuhva chingtuten a hralhna kawngah harsatna an tawk nasa a. Kan han sawrkar ve leh khan kan Home Minister Pu K. Sapdanga kaihhruaina hnuaiah ruihhlo leh Kuhva tawlhruk chu theihtawp chhuahin kan do ta a. Kan man nasa a, a dahna kan nei seng lova, kan Magistrate ten a tihralnate pawh an ngaihtuah a nih kha. Tihrem vek chu har deuh mah se, kan thawk tha tih tilangtu chu kan kuhva chingtuten an hralh that ber kum an thleng ta hial kha a ni," a ti.

Kuhva sawngbawlna khawl buntu fakin Lalduhoma chuan, "Private Company, min rawn dawrtu zinga rintlak tak mai chu SSB Agro te hi an ni a. Kum 2024 June thlaah Buhchangphaiah hian a hmunhma tur ram leiin bul an tan a, an tum ang ngeiin reiloteah khawl chak tak, darkar khata pum 3000 kheh thei an din fel a. Vawiinah kan lo hawng thei ta a ni. An chungah kan lawm hle."

"Loneitute hnen atanga Kuhva leia an hnenah hralh leh tu (Procurement & Supply of Arecanut) turin Mizoram Agriculture Marketing Cooperative Society (MAMCOS) te nen inremna an siam tih te ka lo hria a. SSB Agro hmalakna zar zotu pawh kan tam dawn tih a chiang a ni, a ti a. An kal zelna turah duhsakna ka hlan a ni," a ti.