ZALEN May 4, 2026 : Court lehkha lem hmanga Lunglei District Jail atanga mi 16 chhuah tirtu a puh Lalthangtura chu Lunglei Police ten Darkar 72 an kawl hnuah vawiin khan Court-ah in lanin, Court chuan Darkar 72 dang kawl phalna a pe leh a, Court chuan Jeremy-an Bank Account a hman hawh sak, Laltlanhlua pawh Darkar 72 chhung Police in an kawl a rem ti bawk.

Darkar 72 dang hun an dil belh leh chhan chungchangah hian thulakna chuan Lunglei Police te chuan, thu an zawh fiahnaa Jeremy Lalthangtura thu sawite chu a dik ngei em tih finfiaha an chhui zui zel thu leh District Jail-a tang lai te pawh thu an zawh an ti a, hun an mamawh rei phah tih sawiin Jeremy-a'n Bank Account a hman sak, Jail tang Motor Driver Laltlanhlua pawh Zirtawp Ni, 1,5,2026 khan an man tih an sawi a, thu zawh fiah mek niin a account a pawisa luh dan leh a chhuahna te chu enfiah hmabak a nih thu an sawi bawk.

Court lehkha lem ni ngeia hriat hman a nih avang hian tunhnai-ah Lunglei District Jail-a tanglai mi 16 te chu Jail thuneitu ten an chhuah tir a, hemi chungchanga District & Session Judge, Lunglei chuan April ni 27-a Lunglei Police Stationa FIR a thehluh chu bawhzuiin mawhphurtu a ngaih, Dist Jail Lunglei-a tanglai, Jeremy Lalthangtura chu thu zawh fiah turin an la a, Court in Darkar 72 chhung Police in an kawl a rem tih na chu vawiin May Ni 4 hian a zawh avangin Jeremy Lalthangtura chu court-ah a in lan leh a ni.

Court chuan Darkar 72 dang kawlphalna a ti chhuak leh bakah Jeremy-an Bank Account a hman hawh sak, Jail tang Motor Driver Laltlanhlua pawh Police-in Darkar 72 an kawl a phal sak bawk a ni.