ZALEN February 22, 2025 : Chief Minister Lalduhoma chuan Mizoram leh Manipur inrinaa Tuivai Lei, kum 28 vel zawh theih lova awm tawh dawh that leh chu a hawng a, a hmingah Unity Bridge a vuah.

Lalduhoma chuan, "Selling – Tipaimukh kawng hi tun hma chuan Border Road Organization (BRO) enkawl a ni a. Lei (Bailey Bridge) hmasa ber pawh kha BRO in an dawh a ni. Mahse kum 1990-ah tui lian in a la a. Mizoram PWD hian kum 1992 khan a lei inghahna (Abutment) siam tha chuang lovin, Bailey Bridge a dawh tha leh a. Vanduaithlak takin hei pawh hi kum 1997 a tui lianin a la leh ta a ni. Kum 1997-a a chhiat hma zawng kha chuan he kawngpui hi Mizoram leh Manipur inkalpawhna kawng pawimawh ber a ni thin a, Inter State Bus te pawh tlantir a ni."

"Lei dawh tha leh tur hian PWD chuan hma an la leh ta a. Tui lianin a lak mai tawh loh nan Mizoram lam leh Manipur lama lei dotu (abutment) chu kum 1999 khan meter 6 laiin an tisang a. Hma an lak mek lai hian Seling to Tipaimukh road hi National Highway atana puan a ni ta a ni. MoRTH lamin permanent-a dawh tumin hma an la mek tih hre chungin, sum leh pai seng lutuk lo va, a part hlui te fawm khawm a, hun engemaw chen atana hman theih tur Bailey Bridge dawh kan rilruk ta a. Hna an thawh tan lai nikum May ni 9 khan keimah ngeiin a hmun hi ka tlawh a. Hmanraw thar hmanga dawh zawk turin PWD Engineer te ka hrilh ta a ni," a ti.

Chief Minister chuan, "May ni 10, 2024 khan an sum mamawh Rs 500.00 lakhs kan sanction zui nghal bawk. Hna hmanhmawhthlak bik leh pawimawh bika kan ngaih avangin chak takin an bawhzui a, kum khat pawh a ral hmain an dawh zo va, tun thla ni 2 khan uluk takin an enchhin a, tha tawkah an ngai a. Vawiinah a lei hmasa a chhiat atanga kum 28 naah, kalphung thar, mipui sawrkar chuan kan lo dawh kai leh ta a ni," a ti.

"Kawngpui tha pahnih kan lo nei dawn ta hi thaw a veng huai mai. He lei chhawr phak mipuite ka lawmpui a, Manipura kan unau harsatna tuar mekte puala theihtawp chhuaha kan dawh a nih avangin Inunauna Lei (Unity Bridge) tiin a hming ka vuah a ni. Kan PWD engineer te thawhrimna leh inpeknaah kan lawm hle a, duat takin, a dawl zawh tawk chauh nena zawhin kan enkawl dawn nia," a ti bawk.

PWD Minister Vanlalhlana pawhin thu sawiin, "Tuipuiin min daidan a, tun hmain lei lo dawh thin mah ila, tui lianin min laksak leh thin a. Lei a that loh kha chuan unau kan intlawhpawh thei lo va, inhnaih tak kha inhlatin kan awm phah thin. Kan sawrkar ve leh khan Lalmuanpuia Punte, MLA hian he lai lei dawh a tulzia hi min hrilh a. A pawimawhzia ka hriat khan dawh ngei turin ka rilru hi a intiam a ni," a ti.

He hunah hian Speaker Lalbiakzama, Leader of Opposition Lalchhandama Ralte, bilatu MLA ni bawk leh Adviser to CM Lalmuanpuia Punte te pawhin thu an sawi a. Hawnna inkhawmah hian Lalfamkima, Dy. Speaker ; Lalthansanga, Forest Minister ; Lalchhanzova, Supply Minister ; RM Chakma, MLA te, Mizoram sawrkar official, Pherzawl district leh Mizoram lam mipui engemawzat an tel a ni.

Technical Report hi Er. Lalsangliana Chhakchhuak, E-in-C, PWD-in a pe a, he lei sei zawng hi 200 mtrs (TDR) a ni a, a lawn kaina lei hi meter 50 (DS) a nei a, a vaia meter 250 a sei a ni. Metric ton 30 dawl zo tura dawh a ni a, nimahsela, tlo leh him taka a awm theih nan 20 MT chin chauh zawhtir an phal dawn niin a sawi.