Aizawl: Mizoram Larsap P.S. Sreedharan Pillai'an COVID-19 inkharkhip laia lehkhabu a ziah hrang hrang te chu nimin khan Raj Bhavan Durbar Hall-ah Chief Minister Zoramthanga chuan a tlangzarh.

Lehkhabu tlangzarhtu Chief Minister Zoramthanga chuan Governor P.S. Sreedharan Pillai chu dan hremi a nihna leh mipui rawngbawl hna a thawhna bakah ziakmi ropui tak, lehkhabu 100 chuang sulhnu lo nei tawh a ni chu ngaihsanawm a tih thu a sawi a. Mi pangngai tan thu ziak leh hla phuah a harsatzia a hriat thu sawiin, Governor erawh chuan hun reilo te chhungin kutchhuak heti zat a nei tawh tih han hriat hian mi bik a nih zia a lantir thu a sawi a ni.

Lehkhabu tlangzarhna hunah hian Chief Minister hlui Lal Thanhawla pawhin lockdown hun tangkai taka hmang a lehkhabu tam tak governor in a ziak hman chu ropui a tih thu a sawi a. Sap tawnga Mizoram chanchin ziakna lehkhabu awm zat chu duh thu a la samlo hle a, chutih kara kan Governor in Mizoram chanchin thu leh hla tha tak tak a ziak chu entawntlak a tih thu a sawi a. Mizoram chanchin leh Mizo te chanchin tam zawka ziak zel turin duhsakna a hlan a ni.

Tlangzarh in-khawmah hian Governor P.S. Sreedharan Pillai kutchhuak thu leh hla lehkhabu 13 chu Chief Minister chuan a chhawpchhuah sak a. Heng lehkhabu te hi hmun hrang hrangah a tahtawl a tlangzarh tur a ni a. Niminah hian lehkhabu pakhat "Corona Kavithakal", COVID-19 chungchanga hla thu a phuah, Malayalam tawnga ziak chu Chief Minister hian a tlangzarh sak nghal a ni. Gauhati High Court Chief Justice, Justice Ajai Lamba chuan 'Republic Day 2020' leh 'Thus Speaks the Governor' tih chu Guwahati atangin video katlangin a rawn tlangzarh sak bawk.

Lehkhabu tlangzarh inkhawmah hian Justice Michael Zothankhuma, Judge, Gauhati High Court, Justice Nelson Sailo, Judge, High Court leh Chief Secretary Lalnunmawia Chuaungo te chu sawm bik tlemte zingah an tel a ni.