ZALEN July 16, 2025 : Vawiin khan Congress Thalai headquarters hruaitute chuan Durtlang leh Kawnpui inkar kawng, Vairengte leh Kawnpui inkar kawng dinhmun hmunah an enfiah a, ZPM sawrkara Chief Minister leh PWD Minister-ah midang dah a nih hma chuan kalphung tharah engmah beisei tur a awm lo, an ti.

Congress Thalai hruaitute chuan kawng siamtu NHIDCL, Balaji leh Randu Construction hotute nen inkawmin kawng chhe lutuk leh kawng siam tawhte pawh a that loh em avangin Mizoram mipuiin harsatna namen lo an tawk tih an sawi a. Sawrkarin kawng a vil that tawk loh zia a chiang hle an ti. 

MPCC President Laltawnliana chuan Congress thalai chuan Chief Minister leh ZPM sawrkar hian kawng siamtute a thunun ngam lova, an ngenna leh nawrna pawh engahmah an ngai lo, tih sawiin kawng siamtute chuan ZPM sawrkar aiin Mizoram BJP President thar Dr. K. Beichhua ngenna an ngai pawimawh zawk hian ZPM sawrkarah thil engkim a harsa deuh deuh dawn tih hi a lang chiang hle a ti. 

Laltawnliana chuan, "He kawngin a paltlang khua Vairengte leh Sairang inkar kawng mai a ni lo, khawchhung kawngte pawh chen hrehawm khawpin a chhia a. Khawchhungah motor lian kawng chhia avangin an tlu a, chutih laiin heng lai bialtu ZPM sawrkara Deputy Speaker erawh motor changkang leh manto chhungah chuangin kawngchhia an inkhar-khum san a, kawng tha neih chu thil beiseiawm tak a ni lo," a ti

MPCC President chuan, "Mizoramin kawng tha kan neih theihna turin Chief Minister Pu Lalduhoma leh PWD Minister Pu Vanlalhlana hian an nihna hi midang an ken ngam hunah chauh Mizoramin kawng tha kan neih a beiseiawm," a ti bawk.