Aizawl May 24, 2024: Vawiin khan Chief Minister Lalduhoma chuan Mega River Cleaning Programme hnatlang Tuikual luia neih chu a telpui a. He hnatlang hi Lalnghinglova Hmar, Minister of State, Sports and Youth Services etc., chuan a telpui bawk.

Chief Minister chuan, "Tlawng luiah hian zanah Len ka deng fo thin a, ka hrechiang hle. A bawlhhlawhzia hi ka hmu a, Chengkawl rawng thleng hian a danglam phah ni tein ka hria. Hei vang hian Tlawng leh a fintu luite hi thenfai tha ka tihna a rei tawh hle. Rilruin a vei reng laiin tlawmngaipawl Save the Riparian in rawn lang thut mai a. In hnathawh video te kan lo thlir a. Sawrkar pawh min beng harh a, mimal tak pawhin min tiphur a, vawiinah ka rawn tel ve ta a ni," a ti.

"Engmah phut nei lova thalai tam tak in hnatlang thin hi hmuhnawm ka ti a, ka chhuang hle che u a ni. In hmalakna hian mipuite min tiharh zel se, bawlhhlawh a hmunah chauh paih tawh thin ila la ka duh hle a ni," a ti. Plastic bawlhhlawh sawngbawlna sawrkarin a siam mek dan tlangpui a tarlang bawk. Chief Minister hian Save the Riparian te hi hnatlang sensovah cheng nuai hnih a lo pe tawh a ni.

Lalnghinglova Hmar pawhin thusawiin, "Save the Riparian te hnathawh hi a chhuanawm a, Mizoram hi a takin an hmangaih a ni tih kan hmu a ni. Mipuite pawh harh thar ila, faina hi nghet takin i nunpui ang u, a ti. He hnatlang min rawn vailiam tur hian Chief Minister hi kan sawm a, mahse ani hian hnatlang vailiam ringawt tur chuan ka lo kal lovang, ka hnatlang ve ngei dawn a ni, tiin min chhang a, vawiinah a rawn tihlawhtling hi kan lawm hle a ni," a ti bawk.

Chief Minister leh Sports Minister te hi Lalramsanga Sailo, Secretary, Sports leh Sports & Youth Services official engemawzat leh Chief Minister Secretariat Official thahnem takin an tawiawm a ni.

Vawiin hnatlang hi Save the Riparian leh NSS Cell, Sports & Youth Services Department ten an huaihawt a ni a. Zirna in sawm atangin NSS mi zanga (500) vel an thawk chhuak.

Save the Riparian te hian an hmalakna thawhkhatnaah Model Veng leh Mission Vengthlang inrina lui, Sakhisih chu ni 20 chhung an lo thian tawh a. A thawh hnihna hi Tuikual lui hnarah tan lehin vawiin hi a ni 13 na a ni a. Ni 30 chhung an theih chen thenfai an tum ang.

Vawiin hnatlang te hman atan hian mi thahnemngai tam takin thilpek an pe a. ZabilianZ group kaltlangin kutkawr; MS Pharmacy, Dawrpui ten box 4, Life Drug Centre, Dawrpui ten box 5, RD Pharmacy, Dawrpui ten box 3, leh FMT Pharmacy, Dawrpui ten box 2 an rawn thawh a ni.