TIBET-AH KHUAHKHIRH DUH LO

President Xi-a sorkar hian an ram chhung (mainland) mai bakah an hnuaia awma inkaihhruaina hrang nei hmunah pawh Covid hi an do nasa hle a. Tibet pawhin an policy khauh tak hi tuarin kar tirah khan zero-Covid policy an duh lohna chu an khawpui, Lhasa-ah nasa takin an lantir a, video pawh a darh nasa hle.

Lhasa khawpui hi thla thum dawn inkharkhipna hnuaiah an awm tawh niin tual chhung thuneitute chuan Ningani khan an sawi a, Covid kai hmuh thar pariat an awm niin an sawi bawk.

Social media-a video thehdarh hrang hrangah chuan inkhuahkhirhna khauh lutuk ning mi tam tak pungkhawmin police nen nasa takin an innawr tih hmuh theih a ni a. Heng mite zinga a tam ber hi Han Chinese, hmun dang atanga pem lutte an ni.

Lhasa-a cheng pakhat chuan inkhuahkhirh duh lohna thleng hi Nilainia mi a nih thu a sawi.

Xi Jinping-a’n Covid awm miah lohna tura an ram siam a tumna kal zelah China-ah chuan khawpui eng emaw zat chu an inkharkhip thar leh mek a, heng zingah coronavirus hmuh hmasak berna, Wuhan khawpui pawh a tel.

Wuhan-a district pakhata mi 8,00,000 chuang zet chu October 30 thleng pawn chhuak lo tura tih an ni.

“Kan hawihai a, kan la hawihai zel dawn niin kan inhria,” tiin mi cheng pakhat chuan Reuters a hrilh.

Khawvela iPhone siam chhuahna hmun lian ber awmna, Zhengzhou khawpui pawhin inkharkhip hi an tuar bawk.

Hetianga khawpui lian tak tak an kharkhip leh hma ni thum chu a zawnin China-ah hian hri leng kai mi 1,000 chuang hmuh ziah an ni.

Thla tirah khan Xi-a hian zero-Covid policy an kalpui chu tihnep tumna a awm lo tih a lo sawi thawi tawh a, “Mipuiin hri darh lohna tura kan do letna a ni,” a ti.

Analysts Nomura chuan October 24 khan khawpui lian 28 vel chu inkharkhipna hnuaia an awm thu news agency Reuters hnenah a lo sawi tawh a. Heng hmunah hian mi maktaduai 207 vel zet an cheng a, China ramin kum khata sum a thawh chhuah thin hmun lia thena hmun khat zet thawk chhuaktu ang vel an ni.

Tun hnaiah ringawt China-ah hian hmun 200 velah inkharkhip kalpui a ni a, a tam ber chu high leh medium risk an tih huanga mi a ni a. Hmun hrang hrangah inkaihhruaina inang lo neiin low, medium leh high-risk zone-a mite khuahkhirhna a inang lo.

Covid kai hmuh hmasak berna, Wuhan-ah hian kar liam taah khan ni tin mi 25 velin an kai tih hmuh thar a ni thin a, chawlhkar hnih liam ta chhungin mi 200 chuang an tling.

Zhengzhou-a Apple phone siamtu, Foxconn chuan an hna thawk zinga mi tlem tê an buai ve thu an sawi a. Inkhung hran ngaite chu ‘an mamawh thil, rilru lama hruai an ngaihna leh an chhuah hnua enkawlna’ an pek thu an sawi a. iPhone 14 siam hna a ngawr mek lai a nih avangin Apple tan chuan hun khirh tak a nih thu an sawi.

Kar tir lamah khan chhim lama sumdawnna hmunpui, Guangzhou-ah chuan sikul kai leh zanriah eia chhuah khap a ni a, Ningani khan he khawpuiah hian hri kai  mi 19 hmuh an ni a. Veng thenkhatah chuan inkhuahkhirhna hrang hrang kalpui a ni bawk.

Ram dang ang bawkin China-ah hian liantham lem lova Covid kai hlawmna deuh hmun a awm reng a; mahse, anni chuan zero-Covid policy khauh tak an kalpui avangin thuneituten hup beh hmak tumin khuahkhirhna khauh tak tak an kalpui nghal thin.

He kalphung hi mipuiin an ning tawh a, zin chhuah khap reng pawh an phunpui nasa hle hlawm a. An eibar dinhmun pawhin a tuar a, April leh June inkara an sum thawh chhuah pawh a hma thla thuma an thawh chhuah aiin 2.6%-in a tlem zawk.