Aizawl : Serchhip district huam chhung Indo-Myanmar ramri a awm Sailulak khuaa sial 10 chuang chu tunhnai khan chinghne rualin an khawih sak a, sial neitu leh khawtlang an mangang hle.

Heng Chinghne rual hian sial sawm zet seh tawhin tunkar tir atang khan a seh tan a, Sial neitute hian tunah chuan an tlatna hmunah an inven chhawk mek a ni. Chinghnia hi a tak chuan an hmu chiah lo a, an hniak erawh an hmu thin niin VCP Sawma chuan ZALEN a hrilh. Sailulak khua hian sial hi an vulhna a la rei lo a, thenkhat te hi chuan bank loan hmang te a an lak avangin an buai hle tawh a, thuneitu lamin ngaihtuah thuai se an duh thu an sawi. Chinghnia hi eng tianga hnawh bo tur nge tih an la hriat loh thu an sawi a, an bialtu Forest Range Officer hnenah pawh an thlen tawh thu leh kah phalna a la pe lo tih pawh sawiin, an hmu a nih pawhin haw haw a hnawh bo mai loh chu tih ngaihna an hre lo, tih an sawi tel bawk. Sailulak khua hian sial 260 chuang vulh mek a, chhungkaw tam tak sial vulha innghat an awm mek a ni.