Aizawl: Chief Secretary leh Save Chite Lui Coordination Committee (SCLCC) Chairman ni bawk Lalnunmawia Chuaungo hovin Zirtawpni khan Chite luia polythene hnawmhnawk lutte hmanga Mizorama Green Road (Plastic Road) hmasa ber siam dan tur hmalakna kal mek an thlir ho.

Chief Secretary Conference Room-a meeting-ah hian kawng siamna atana hman zui theih chi polythene hnawmhnawk zinga rawng nei lo leh a fim chite chu Chite lui leh a zawmtu lui hrang hrang atangin SCLCC chuan quintal 2 a leikhawm tawh a, hengte hi PWD kutah a hlan chhawng tawh a, hman mai theih turin singsak zui a ni dawn a ni.

Mizorama Green Road hmasa ber atan Reiek khaw chhung atanga Zokhua Cafeteria inkar kawng, 1 km. a thui chu siam tum a ni a, Anthurium Festival neih hma ngeiin he kawng hi peih fel hman tum a niin Aizawl Road South Division-in an bawhzui dawn a ni.

He kawng hi kawng pawimawh tak anih dawn avangin thukhawmte chuan uluk taka siam nise an ti a, a tir atanga vilpuitu tur Monitoring Group pawh din nise an ti a; hemi atan hian tlawmngai turin NGO-te sawm nise an ti a ni.

Mizoram tan a vawi khatna a nih dawn avangin kawng siam tan tirh atanga mipui hman theih tura hawn a nih thleng mumal takin documentary film a siam nise an ti bawk a, chumi lo bawhzui turin DIPR ruat an ni.

Meeting chuan Reiek-a hetiang tih chhinna bakah hian Mizorama lui hrang hrang leh veng hrang hrang hnawmhnawk zinga polythene rawng nei lo chi te chu a tahtawlin kawng siamna atana hman zel turin project lian tham zawk siam nise an ti a. He DPR hi Chief Minister hova Chite Lui chungchang sawia thukhawmin an lo sawi tawh bawhzuiin sawrkar laipuia sum dilna atana hman tur zingah telh nise an ti bawk a ni.