Chuhvel ramah Assam-in patrolling an nei ; Mizoram Police-in an vil mek

Admin - Jun 06, 2021

Mamit DC. Dr. Lalrozama IAS leh Mamit police hotute chuan Chuhvel hi tlawh nghalin, Mamit DC chuan Hailakandi DC leh SP te telephone leh ziakin thil awm dan a sawipui

Aizawl: Mamit district Chuhvel ramchhung, Hnanglui zau chu Assam lamin an ram chhungah ngaiin patroling an rawn nei thin a, Mizoram police-te pawhin helai hmun hi vil mekin, boruak duhawm lo thleng a awm zui rih lo.

Chuhvel ram chhung, Hnanglui zaua leilet nei, John Sapdinpuia hnen atanga ZALEN thudawn danin, May 30, 2021 khan Assam police panga leh civil mi 15 vel chu kalin, Assam ramri chin nia ngaihah an hotuten patroling an neihtir thu an sawi a, boruak duhawm lo thleng lovin an let leh a ni.

He thil thleng vang hian May 31, 2021 khan Mamit DC. Dr. Lalrozama IAS leh Mamit police hotute chuan Chuhvel hi tlawh nghalin, Mamit DC chuan Hailakandi DC leh SP te telephone leh ziakin thil awm dan a sawipui nghal a, mipui tichiai thei buaina a thlen lohna tura hmala turin Hailakandi thuneitute chu a hriattir a ni.

Chuhvel-ah hian Mamit bakah Aizawl atangin Armed police eng emaw zah an kal nghal bawk a, a tul angin ramri venhim hna an kalpui mek tih thudawnna chuan a sawi. 

June 3, 2021 khan Assam police leh civil mi thenkhatte chuan Chuhvel ram Hnanglui zau hi an rawn lut leh a, Mizoram lam atangin police-te a hmunah an lo awm avangin rei awm lo vin an let leh nghal a, hemi bak hi chu nimin thleng kha chuan Assam lam hi an la rawn lang leh lo ni a hriat a ni.

Chuhvel ram chhung Hnanglui zauah hian Mizo leilet nei chhungkaw eng emaw zah an awm a, tun hnaiah leilet neitute hian JCB hmanga hmalaknate an nei a, hei hi Assam lam hian an rawn ngaimawh nia an rin thu thudawnna John Sapdinpuia chuan ZALEN hrilhin, Assam lam hi chet rawn lak zui tumin an inchah belh mek ni pawha an hriat thu a sawi.

Mamit DC chuan Mizoram police-ten tunah hian Saikhawthlir BOP atangin Chuhvel hi an vil mek tih ZALEN hrilhin, a tul angin patroling an nei thin tih a sawi a, ramri-ah buaina a thlen lohna turin inbiakna a kal mek thu a sawi. 

Share now