Inrinni zana Manchester City an hneh loh hnuah khan Manchester United manager Erik ten Hag chuan he thu hi a sawi a, kan pawmpui em?

“Khawvelah tun laia team tha ber, City laka bei let thei awm chhun kan niin ka hria,” tiin rang taka si khata an phurh hnua an beih let chungchang a sawi.

A vawi khat nana FA Cup final-a Manchester derby khelhah Premier League champion hian 2-1 in an thenawm an hneh a, nomawi pathum an beiseiah pahnih an la ta a, Inrinni zanah a pathumna tur an la thei dawn em hriat a ni ang.

Inkhelh zawhah chak lo coach chuan, “FA Cup an lak avangin City ka lawmpui duh a; mahse, an chak hram ve tho a ni,” tiin insawi thei tur an ni bik lo tih a sawi a. “El tawk takin kan khel a, kan inpumkhat tha a, tun dinhmuna khawvela team tha ber hi hun tha kan siamtir lo,” a ti.

“Rang taka goal an thun pawh kan chhang let a, City bei let thei awm chhun kan niin ka inngai,” tiin chak lo mah se an nep bik lo nia a ngaih thu a sawi.

Dutch manager sawi ang hian minute 90 chhung khan United hi an nep lutuk bik lo. Opta-in statistics a neihah pawh goal-ah vawi 13 petin a chak zawk aiin an vawi hnihin an pet tam a; goal zawnah erawh vawi thum chauh a kal a, City-in vawi hnihin goal zawna pet an ngah.

Ball pawh City-in chak tam zawkin 60% an chan laiin United-in 40% an chang a. Corner erawh vawi thum ve ve an hmu a. Inkhel pum pui thlirin an thenawm khan lo deuh angin lang mah se ‘an nep lutuk bik lo’ tia sawi theih a ni.

Wembley-a final khelhah khan tan chiahah Ilkay Gondugan-a thun chu penalty hmangin minute 33-ah Bruno Fernandes-a’n United tan a sut a. Second half tan atanga minute rukah Gundogan bawkin thun lehin goal danga  awm belh lo.

German midfielder goal thun pahnihte hi Kevin de Bruyne siamsak ve ve a ni.