Aizawl, August 11, 2023 : Central KTP leh Lailen Consulting Pvt Ltd tangkawpin an siam, Kristian Thalai Pawl Mobile Application chu vawiin August ni 11, 2023 khan Central KTP Leader, Rev Dr. F. Pachhunga’n a tlangzarh.

Tlangzarh inkhawm hi Lailen Consulting Pvt. Ltd. Office ah neih a ni a. Upa Johny Lalawmpuia, Chairman, Media & Doc. Sub-Committee, in inkhawm hi kaihruaiin, tlangzarhtu, Central KTP Leader Rev Dr. F. Pachhunga chuan, “Central KTP lam kaihhnawih thil hi hmun tin atangin zawhna kan dawng ve thin a, a chhanna tam tak he app hian a pe nghal dawn a ni” a ti.

Tlangzarh Inkhawm ah hian Lallianzuali, Secretary, Media & Documentation Sub-Committee, Central KTP chuan report pe in, “KTP General Conference, Vawi 59-na in a rel angin Mobile Application siamna atan hmalak tan a ni a. Chu hmalakna chu bawhzuiin Lailen Consulting Pvt Ltd in a thlawna an siamsak theih thu an hriat hnuah, Media & Documentation Sub-Committee nen inhmukhawm in, October ni 10, 2022 ah inremna ziah a ni ta a. Hma lak zui zel niin, he Mobile Application hi peih fel a ni ta a ni” a ti.

He Application hi Lailen Consulting Pvt Ltd in a thlawn in KTP tan a siam a. Pu Lawmsangzuala, Project Manager, Lailen Consulting Pvt Ltd chuan App chungchang report pe in, he application hi rawngbawlna a an tih ve theih nia ngaiin, Lailen chuan lawm taka an siam thu a sawi a. He application in a tih theih hrang hrang te a sawi bawk.

He Application hi mi zawng zawngin a thlawnin an hmang thei dawn a, KTP News, Lehkha chhuah, Events, Bial leh branch tin te statistics, Central KTP hruaitu, Synod Choir member te leh Central KTP Calendar te a en theih a. Social Media links hrang hrang dah a ni bawk. Google Playstore and Appstore ah te a thlawna download mai theih a ni.