Aizawl June 27, 2023 : Vawiin khan CTI Sesawngah Mizoram Pradesh Youth Congress Committee (MPYCC) huaihawtin Martarte Lungphun kum 26-na champha hriatrengna hman a ni. Martar Lungphun champha vawi 26-na pual hian CLP Leader Zodintluanga, MPYCC hruaitu hlui leh MLA ni mek ten pangpar an dah a ni. 

MPYCC President hlui leh Martar Lungphun tura sulsutu John Rotluangliana chuan, "Engvangin nge remna leh muanna kan neih kan tih chuan, Congress vang leh a hun laia Chief Minister Lal Thanhawla'n Chief Minister nihna a ken vang a ni. Chief Minister thuthleng in ken hi thil har tak a ni tih kan hre vek a. Mizoram tan zofa te tana remna siamtu Lal Thanhawla hi theihnghilh chi a ni tawh lo a, sawi nep chi a ni lo," a ti.

John Rotluangliana chuan Remna nena an lo haw hnuah pawh MNF party hruaitu ten martar te lung phun tumna an nei lo kha ngaituahna ti thui tak a ni, a ti bawk. 

CLP Leader Zodintluanga pawh in thu sawiin, "Sesawng CTI hmuna Martar Lungphun-ah hian Ram buai avanga nuna chan mi 1168 te hming ziah lan a ni a, Congress sawrkar kha khatih hun lai khan lo piang lo phei se chuan tun a kan Lungphun-a hming kan ziah let hi ziah a ngaih ka rin hial," a ti. 

Zodintluanga chuan, Congress thalai atanga in chher chhuak Congress mi leh sa tam tak an awm tawh thu sawiin, "Minister leh MLA pawh thahnem tak an awm. Tuna congress hruaitu tam zawk hi thalai atanga chhuak an ni," a ti bawk.

MPYCC President Laltawnliana pawh in thu sawiin, "Ram leh hnam tana nunna chan tate chu thangthar te thinlungah an dai tawh ngai dawn lo a, kan hre reng tawh dawn a ni. Kum 1997-a kan din Martarte Lungphun ah hian Politics a awm lo tih hi Zoram mipui ten min hriat nawn sak se ka duh a. Politics khelh nana Martarte hman chin chu thil tha lo leh thil tih chi loh a ni," a ti. 

CTI Sesawng Martar Lungphun hi Martar te hriatreng na Lungphun hmasa ber a ni a, kum 1997, June ni 27 khan Mizoram Pradesh Congress Committee President Lal Thanhawla'n a hawng a. Lungphun buaipuitute hi MPYCC niin, he lungphun hi kum tih tlawhin June ni 27 apiangin hun an hmang thin a ni.  

Martar Lungphun ah hian ram buai laia hnam sipai leh civil mi nunna chante hming vawiin thleng hian mi 1168 ziah lan a ni tawh a. Kum 2014 khan Martar Sergeant Lalhuha ruhro pawh phum a lo ni tawh bak a, report thar dawn a awm chuan hming hi ziah belh zel theih a la ni bawk.