ZALEN July 29, 2025; ZPM thupuangtu K Laltluangkima'n CM car thar chu state khat CM chuanna atan chuan car pangngai mai a nih thu leh mi ramah chuan mi satliah car, hmeichhe khalh tawka ngaih, naupang football khel tur hruaina tawk a nih thu a sawi.

Vawiin chawhnu dar 1:30 khan Aizawl press clubah thuthar thehdarhtute a kawmna-ah he thu hi sawiin, ZPM thupuangtu chuan, kan CM hian inthlan hma khan, "ZPM Chief Minister chu car man to-ah a ṭhu dawn lo" a ti a nih kha. Hei ZPM chuan CM chu kan han nei ta a. CM hlui car chu an chhawm ve ta a. He a car chhawm hi kum 15 vela upa tawh repair reng ngai kha anih tak avangin CM chu car thar Toyota leisak a ni ta a. Hetiang car hi a man nuaih 20 vel atanga intanin chi hrang hrang a awm a, a to pawl chu nuaih 32 vel a nih thu a sawi.

"Hei hi tun laiah chuan state khat CM chuanna atan chuan car pangngai mai a ni a. Mi ramah chuan mi satliah car ang a ni, hmeichhe khalh tawka ngaih, naupang football khel tur hruaina tawk a ni," a ti.

Mizoram hi international ramri depa awm kan nih avangin kan CM hian Z+ category security a nei tih sawi bawkin, K Laltluangkima chuan, kan CM in campaign laia "Car man tovah a chuang lovang" a tih hun lai nen khan thil a danglam nasa tawh hle niin a sawi a, "Kawl ramah pawh Kawlho chang an do lova, Zo hnahthlak leh Zo hnahthlak te pawh an indo tawh a ni a, chutiang khawp chuan kan ram dep ho hi a ralṭi a; chutih lai kara car man tlawm ber mai kan ram lal ber tana lo la hisappui tlat hi chu thil intu lo tak a ni tawh," tiin, "India sawrkar in CM tana a pek theih security chu Z+ a ni a, PSO 3, Pilot personnel mi 15, Escord personnel mi 19 hmang reng thei a ni a. Chu chu amah hi chuan a hautak a tih avangin a duh lo zawk a. A tul a tih chuan bullet proof car pawh hmang thei a ni a. Chutih lai karah hetiang car satliah a a inhnukhniam thei hi chu fak mawlh mawlh tur zawk a ni dawn lawm ni,?" a ti bawk. 

"India ram CM hi an inang lo khawp a, CM thenkhat nuaih 300 man car hmang an an awm laiin a then chuan Maruti Alto te an hmang ve mai mai bawk a, phai ram kawng tha tak neihna te a nih avangin a inawm tho ve bawk a. Kan ram kawng te hi kum 37 chhung khan lo ti tha pur tawh ni ila chu kan CM pawh hian car satliah tak tak te pawh a hmang ve mai mai thei tur a ni a. Mahse kan tun dinhmun hian a zir mawlh lo va, car man tlawm uchuak chu kawng chhiat nen, a chhuk chho nen, a ralmuang lo thut thei kan ni reng nen car man tlawm lutuk chu a him mawlh lo a ni. Tuna a car hman mek hi a awm tawk ren rawn viau va, hei aia to leh tha pawh hi hmang ni se, kan Mizoram dinhmun mek nen hian a la inawm tawk viau tho ang," ZPM thupuangtu chuan a ti bawk.

#ZalenNews