ZALEN July 18, 2025 : Chief Minister hlui Zoramthanga leh Er. H. Lalzirliana, MLA te thaha vautu Rodinliana (39), Khawzawl leh Chanchinmawia (49), Lungleng Veng, Hnahthial te chu Court in thiam chan tirin a chhuah zalen.

February 15, 2022 khan ziakin SI Lalmuanpuia Sailo, Cyber Crime Police Station chuan Cyber Crime PS-ah FIR - C.No.42/22, Crl.Tr.No.921/2002u/s 120 B/ 124 A/506 (b)507/34IPC ziahluh a ni. Facebook group pakhat 'ZORAM POLITICS GROUP I' ah 'Thingtlang Pa' inti in khatihlaia Mizoram Chief Minister Zoramthanga chu facebook kaltlangin thah tuma a vau vang a ni a, a chhui tur pawh hi ruat nghal a ni.

Cyber Crime lam chuan Google leh Facebook Law Enforcement Team lamah pawh he account neitu hi lo chhui sak turin an ti a, anni lam pawh hian a document te an rawn thawn let a, a in-registered nana a phone hman chu K. Vanlalruati, Venghnuai hminga registered a lo ni thung a, phone-a an biak pawhin switched off a ni a, a chhui zel hnuah he phone number hi Rodinliana S/o T. Ngursiama (L), Khawzawl, Hermon Vengin a hmang tih hriatchhuah a ni. 13.3.2022 khan man zui a ni a, Rodinliana hian a facebook user name hi 'Thingtlang Pa' tih atangin 'Ram Siamthatu Pawl' tih in a thlak zui bawk.

Chhui zui zelnaah Rodinliana hian Facebook account user 'CC Azyu' nen Facebook Messenger hmangin an inbe thin tih hriat a ni a, group siam te an tum tih an hrechhuak bawk a, 'CC Azyu' tih a account samtu hi Chanchinmawia, Zohnuai, Lunglei tih hriat a ni bawk. 'Ani hian 'Chiauhiartea Hiara' tih user account hmangin facebook-ah Er. H. Lalzirliana, Mamit MLA chu thah-ah a vau ve bawk a, Lunglei Police te chuan amah hi an man zui a ni.

Police lam hian engemaw chen an chhuizui hnuah court-ah an chhuizuina hi thehluh a nih hnuah court chuan an chungthu hi a ngaihtuah a, Judicial Magistrate First Class-I, Aizawl District, Aizawl, Mizoram chuan thutlukna siamin Police te chhuina hi finfiahna a tha tawk lo a ti a, thubuai an siamsak te hren zuina fak tur a awm lo tiin a chhuah zalen a ni.