ZALEN July 21, 2025 : Chief Minister Lalduhoma hovin a office-ah PWD Minister Vanlalhlana, PWD official te leh Finance Department hotuten tun laia kawngpui chhe zual umzui dan tur an sawiho a, hmu thuma kawng tha lo siam nan cheng nuai 185 pekchhuah an rem ti.

PWD Minister Vanlalhlanan Inrinni-a Mamit district leh Bairabi a tlawh chungchang a sawi hmasa a, Mamit Sub Hqrs. YMA leh MJA te nena an inkawm thute pawh a tarlang. Chu mi hnuah hma lak dan tur hetiang hian an rel.

Darlak - Tuidam inkar kawng hi kawng thar zawk sialtu contractor te an tlakchhiat avangin an contract tihtawp loh theih lohvin an awm a. Tunah hian tender thar chhuah dilna central sawrkarah a awm mek a, he dilna hi umzui mek a ni. A helna, kawng hlui, tuna hman mek hi PWD lamin a zualpui lo thawm tha se, an ti a. A thawhna tur pawisa pawh Rs. 20 lakh ruahman a ni.

Mamit - Bairabi kawngpui hi a grade a tha a, khuar (pot holes) a tam rih thung a. He kawngpui hi hman theiha a awm reng theih nan a tul lai apiang thawm that ni se an ti. He kawngpui hi engemaw thulha Kolasib lam kawngpui a lo pin pawha hman theih a ni. A thawm that nan Nuai 65 chu pek chhuah an rem ti.

Tuna bungraw phurtuten harsatna an tawhna lian ber Kawnpui - Buichali - Sairang kawngpui chungchang pawh an sawi a. NHIDCL te kuta awm, state sawrkar mawhphurhna ni tawh lo ni mah se, nitin chak lakna pui ber a nih avangin; nikum lama sawrkarin a lo hnawh tawh ang khan, kuminah pawh a zualpui hi hnawh leh mai ni se, an ti. Hnathawh nan Nuai 100 ruahman nghal a ni.

A bawhzuitu tur Coordination Committee, Secretary PWD kaihhruaina hnuaiah din a ni a. Anni hian hmanraw mamawh te lakhawmin zanin atangin hna an tan ang.

NHIDCL lam pawh na zawka nawr ni se, central sawrkarah pawh a tul anga hriattir ni se an ti.