Aizawl June 14, 2023: Lengpui Airport inrelbawlna leh venhimna chungchanga te ngaihtuahin vawiin khan Chief Minister Zoramthanga hovin meeting neih a ni a, Chhim lama Green Field Airport siam tur leh Tuirial Airfield siamthat bakah helipad tihchangtlun dan tur te an sawiho.

Mizoram-in Aviation lama hma a lak mekna, chhim lama Green Field Airport siam tura hmalakna te, Tuirial Airfield siamthat leh hmun hrang hranga helipad te tihchangtlun chungchang te meeting-ah hian sawi a ni.

CM Conference Hall-a meeting hian kumin February ni 11-a Chief Minister hova meeting neih tawh leh April ni 14-a Ministry of Civil Aviation Secretary hova meeting neih tawh bawhzuina leh hmabak awm te sawiho a ni a. Lengpui Airport hungna siam tur leh survey nei tura hmalakna te, security bungrua thuam that te, CCTV system tihchangtlun te, post thenkhata thawktu indaihlohna a hmalak dan te, training pek dan tur te sawiho a ni bawk. 

Meeting-ah hian Chief Secretary Dr. Renu Sharma leh Finance, GAD, Home, DP&AR, Revenue, Civil Aviation leh department dang atang te in hotute an tel a ni.