ZALEN December 20, 2025: Chief Minister Lalduhoma chuan vawiin khan Megawatt 10 pe chhuak thei Ni zung chakna atanga electric power siamna, 10MWp Grid Connected Solar Photovoltaic (SPV) Power Plant Thenzawl, Mizoram chu a hawng. P&E Minister F. Rodingliana chu khualzahawm a ni.

He Plant hi NABARD sum Rs. 74.82 crore senga din a ni a, Mizoram ta niin power a siam chhuahte hi lei a ngai lo a ni.

Chief Minister chuan vawiin hi Mizoram tana ni lawmawm tak a ni a, he plant a puitlin theih nana thawktu P&E Minister leh a thawhpuite zawng zawng chungah lawmthu sawi.

Chief Minister-in power chungchanga a thusawi dangte chu:

1. Solar Park hi Sumsuihah 5 MWp pe chhuak thei tur kan tan leh tawh a. Zawh thuai kan tum.

2. Solar Park siamna tur ruahmanna dang hi kan la nei nual a, kan la thleng thui lutuk lo thung. Chungte chu; Keifang - 10MWp te, Tumtuitlang, Serchhip – 10 MWp te, Bawkmual, Hmunhmeltha – 10 MWp te, Denlung Ram, Hnahthial – 10 MWp te, Tlabung Tlang, Lallen – 6 MWp te leh Dawhzau Zau, Lamzawl – 20 MWp te an ni.

3. Rs. 676 crore senga 24 Megawatt pe chhuak thei tur Tuirini Hydel Project lung kan phum thei tep tawh a. A sum min petu tur – New Development Bank hotute nen hman ni lawk khan ka office-ah kan inkawm a. Kan tumruhzia an rawn hmu a, an phur hle. 

4. Tuivai HEP, Megawatt 132 pe chhuak thei tur ruahmanna pawh chak takin kan kalpui mek a. He project hi a hlawhtlin hunah phei chuan Mizoramin energy hnianghnar kan nei thei tawh hial ang.

5. Kan Plant hlui zual pasarihte chu a enkawlte a lo hautak tak avangin outsource mai ila kan ti a. Heng kan unit pasarihte zinga a thenkhat hi a enkawl hawhtu turte hian tihlen (augment) an inhuam a, a then phei chu a leta tihlen an tum a ni.  

Kan outsource chuan a free-in tam tham tak kan dawng dawn a, an power siamte chu leisak ngei ngei kan ba dawn lova, kan lei duh a nih erawh chuan priority min pe thung ang. A enkawlna senso kan seng tawh lo vang a, a enkawl mektu hnathawktu za chuang te hi hmun dangah kan sawn thei bawk ang a. Power Plant lian zawk kan siamna turah kan insawrbing thei dawn a ni. Kan ram ro hlu kan hralh a ni lova, hlu lehzual turin midang kan enkawl hawhtir dawn zawk a ni.

6. Energy hi mipuiten an ban phak loh chuan a tangkai si lova. Chuvangin kum nga chhung electric bill kan ti sang ve lovang kan ti a. Kan intiam ang ngeiin vawiin thlengin a bill hi kan la tisang lo. Mi rethei zawk leh thilsiamna tenau neituten an chhawr hle. 

7. Kumin August ni 1 atang khan Mizoram pumah online payment hmanga bill pek theih a ni.

8. Mizoramin power man ba kan neihte kan rul ngar ngar a, rebate hmu thei khawpin kan dinhmun kan siam tha a. December 2023 atanga tun December 2025 thlenga Bill kan pek that lawmman (rebate) kan hmuh hi Rs. 6,57,93,152 a tling tawh a ni.

9. Kan financial position hi kan siam tha mek a, mita hmuh theih hmasawnna ni rih lo mahse sum leh pai dinhmun hrisel zawk neih kawngah hma kan sawn hle. Tun hnai maiah khan RBI chuan Mizoram sum dinhmun a that thu leh state tenau zinga sum dinhmun nei tha ber pawl a nih thu a sawi a ni tih te an ni a. Kum hnih chhunga sorkarin hmasawnna hna a thawh dangte pawh a tarlang a ni.

Khualzahawm F. Rodingliana, Minister pawhin thusawiin, kum tinin power kan mamawhna hi 7.6% velin a sang zel a, kan mamawh san lai berin Megawatt 160 kan mamawh tawh a. Kan mamawh phuhru zo ngei neih tum hian ruahmanna kan siam a, chak takin kan bawhzui a, kan hlawhtlin ngei kan ring. Pump Storage Power hmangin Vankal Solar Plant rinchhana Tuichanga kalpui kan tum a, Tuirini HEP 24 Mw hi kum tharah a lung phum kan tum a, Tuivai pawh 132 Mw pe chhuak thei pawh chak takin kan bawhzui mek, tiin an hmalakna tlangpui a tarlang. 

Hydel Power Plant pasarih kan outsource turte hi kan outsource hian sorkar kan hlawk hle zawk dawn tih hi mipuiten hria se kan duh hle a ni, a ti bawk. 

Er. JH Malsawma, E-in-C chuan technical report a pe a, he solar plant hi hlawm hnihah an then a, chhak lamah leh thlang lamah an zar pharh a, a laiah 132 KV Sub Station an bun a. Kum 2023 October atangin an thawk tan a, kumin March thla khan thawh zawh tura ruahman a ni. Nimahse, kumin kum tirah khan a hmunhmaah kangmei a chhuak a, a pumin an zo hman ta lova, a zatve, khawchhak lam hi March thla khan a nung tawh a, a zatve dang, a thlang lam hi chu kumin August ni 18 khan a nung thei ta chauh a ni. Tihnun a nih atanga vawiin thlenga power a siam chhuah hlut zawng hi ram pawn atanga kan leina rate chawhrual Rs. 5.34 per Unit anga chhutin Rs 3.42 crore manhu a ni tawh a ni. 

He plant atanga siam power hi 132KV line Lunglei leh Serchhip Bukpui line a thlunzawm a, 33 Kv Thenzawl Sub Station nena thlunzawm leh turin ruahmanna siam a ni.