Aizawl August 15, 2022: Pachhunga University College chuan vawiin khan an auditorium-ah hlawhtlinna an hmuh te avanga lawmthu sawina, 'Thanksgiving and Grand Celebration' hun an hmang a, Chief Minister Zoramthanga chuan he hun hi a hman pui a, College dang te tana entawntlan tlak ni tura tan la  zel turin a fuih.

Zoramthanga chuan, Pachhunga University College chu North East mai ni lo, India huap pawha lang tham college tha Mizoramin a nei chu chhuanawm a tih thu a sawi. Hmarchhak State ah zirna kawngah a tha ber dinhmun hauh pha, khawtlang rawngbawlna - thisen pek, faina, thingphun uar leh ram ngaw humhalh kawngah pawh hmahruaitu, academic chauh ni lo, kawng tam takah hlawhtlinna an hmu chho mek, a ti. CM chuan, "Mizoramin hmelma lian tak kan hmachhawn mek damdawi hmansual te, HIV, cancer leh natna dang hluar te, kan khawtlang nun tibuaitu thil tha lo te hi do turin thalai te an pawimawh," a ti a. Pachhunga University College zirlai leh zirtirtute fuihin, "College atanga bul tanin, college dangte leh thalaite tan entawntlak ni thei tur khawpin tan la rawh u," a ti

Pachhunga University College hian July ni 20-21, 2022 chhung khan National Assessment and Accreditation Council (NAAC) assessment an hmachhawn a, July ni 26, 2022 khan Accreditation A+ Grade pek an ni a, Cumulative Grade Point Average (CGPA) 3.37 an hmu a ni. India Hmarchhaka NAAC A+ College pahnih awm-ah a score sang zawk niin, Hmarchhak college zinga NAAC grading a score sang ber a ni. Sawrkar laipui Ministry of Education hnuaia India rama zirna sang dinhmun endiktu, National Institutional Ranking Framework (NIRF) in ranking an tihchhuah thar berah, Pachhunga University College chuan College category-ah 45-na a hauh phak bawk.

NIRF tehna atanga college tha zual 100 zingah hmarchhak atangin Pachhunga University College hi a tel pha awmchhun an ni. India ram chanchinbu lian, India Today chuan kum 2022 chhunga College tha zual ‘The Best Colleges in India' a thlan chhuah zingah Pachhunga University College (PUC) chu telh a ni a, Arts zirna-ah ram pumah 141 na a ni a, Science-ah ram pumah 167-na niin Commerce zirna-ah 183-na a ni bawk.

Pachhunga University College hi ramngaw neih that leh a humhalh kawnga a thawh that avangin India rama hetiang lam endiktu - Green Mentors, Ahmedabad chuan dinhmun sang ber ‘Platinum Rank’ chu kum 2021-2023 chhung atan an pe. Sawrkar laipui Ministry of Education chuan Aizawl District chhunga ramngaw humhalh tha, vawng thianghlim leh bawlhhlawh sawngbawl tha chawimawina ‘District Green Champion 2021-2022’ chu March ni 22, 2022 khan a hlan bawk a ni.

Pachhunga University College NSS Unit te hian kum riat chhung (2015-2022) zirna In zinga a thlawna thisen pe tam ber lawmman a dawng tawh a. Kum 2022 hian thisen unit 651 pe tawhin Educational Institution category-ah lawmman pakhatna a dawng leh a ni. Mizoram University hnuaia College hrang hrangte inelna ‘Varsity Sports’-ah PUC hian kum 6 chhung (2016, 2017, 2018, 2019, 2021, 2022)  ‘Overall Champion’ dinhmun a hauh a, a zawna champion rei ber an ni mek. Department of Information & Communication Technology-in zirna In zinga website enkawl tha a thlan zingah PUC hian lawmman pathumna a dawng a, online hmanga admission kalpui dan ‘Best Online Service Initiatives’-ah lawmman pangana a dawng bawk a ni.

Programme-ah hian Mizoram University Vice Chancellor Prof. KRS Sambasiva Rao chu khualzahawm a ni a. Pachhunga University hlawhtlinna a lawmpui thu sawiin hmasawn zel turin duhsakna a hlan a ni. PUC Alumni Association aiawhin an President Lalbiakthanga Khiangte in thu a sawi a. Mizoram Synod Moderator Rev.Dr.Vanlalnghaka Ralte chuan Pathian hnena lawmthu sawi tawngtaina hun a hmang a. An Principal Prof. H.Lalthanzara'n kalkhawmte lawmna thu sawiin IQAC Coordinator Dr Henry Lalmawizuala'n report a pe bawk.