Aizawl December 28, 2022: Chief Minister Zoramthanga chuan Sihphir Venghlun GSA Futsal Ground a artificial turf hawnna leh a lawmna tournament a hmanpui naah Leitan leh Sihphir inkar kawng zauh a nih tur thu a sawi a, sanction an hmuhah compensation component a awm loh thu a sawi lang.

Chief Minister chuan hmasawnna ruhrel hrang hrang din a sawrkarin hma a lak thu leh thawh mek leh hmabak la awm thu a sawi a, ram hmasawnna atan sawrkarin theihtawp a chhuah zel tur thu a sawi. Heng zingah chuan Durtlang Leitan leh Sihphir inkar kawng zauh a tel thu te, hemi atana sawrkar laipui atanga sum sanction hmuh ah compensation component a tel loh thu a sawi. CM chuan, "Mizoram hmun thenkhatah compensation beisei avang emaw, beisei tam lutuk avang emaw a hmasawnna hnathawh a lo thuanawp phah tawh a, kan zavaia that tlanna tur a ni tih hriaa rilru zau tak pu in, ram siam rem ngai chungchang lo enzuitu tur committee te pawh a tul anga din a tha ang," a ti. 

Chief Minister chuan Sihphir Venghlun GSA futsal ground chu tangkai taka an hman a, tournament hlawtling tak an neih ngei a duhsak thu a sawi a. He inkhelhna hmun tipuitling tura MLA fund atanga concrete zut leh phul lem phah bakah mi thehnemngaite hmalakna kaltlanga hmalakna lo awm tawh te chu tha a tih thu leh, cheibawl hna thawh hmabak la awm chu a tul anga a bawhzui zel a nih tur thu a sawi bawk.