Aizawl: Chief Minister Zoramthanga chuan nimin khan Lengte Piggery Village a vawk vulhna farm hrang hrang a hmalakna te a hmunah a enpui a, thu sawiin, "Covid-19 hian mahni a kan intodelh a tul zia a takin min zirtir a ni," a ti.

Chief Minister chuan AH& Veterinary Department officer-te leh he Piggery Village-a Lengte leh Nghalchawm vawk vulhtute chu thutkhawmna neih puiin, Mizoram chu hmasawn tur chuan infrastructure lam bakah ei tur chaw, thlai leh sa a kan intodelh hmasak a pawi mawh thu a sawi a. AH & Veterinary Department hnuaia hmalakna chuan mipuiin sa thianghlim an mamawh zat phuhruk mai bakah ran ei tur a intodelh, state pawn atanga lak belh ngai lovin a note pawh intodelh zelna tur a nih chhoh ngei a beisei thu a sawi a. Piggery village chu midangte tana entawn tur a insiam chho tura a beisei thu sawiin, farm neitute chu theihtawp chhuah turin a chah a ni.

Chief Minister chuan COVID-19 avanga sawrkar hmalakna kal mek thenkhat chawlh lai lawk rih ngai te awmin, kalphung thlak ngai te a awm thu a sawi a. Chuti chung chuan sum neih sa chu a hlawk thei ang bera hmangin, ram a intodelh theihna turin thahnemngai taka thawh zui zel a tul thu a sawi a. Chaw, sa leh thlai ah chuan kan ram leilung leh sik leh sa awm dan leh tui dawn thin zat ngaihtuah chuan intodelh ngei ngei thei kan nih thu a sawi.

Piggery Village hi mimalin vawk tlem te te darh sarh taka mahni mamawh a phuhru thei tawk chauh a vawk vulh chu a hlawk loh avangin, ram pum intodelhna atan leh mimal eizawnna tak tak a hman theih turin vawk vulhna hmun bik (Cluster) siamin, vawk vulh tak tak tur te tanpuina tur scheme IPEED project (Invention towards Pig productivity Enhancement through Entrepreneurship Development) siam a ni a. Kum 2018-19 atang khan Rs.391 lakhs total project cost a hmalak tan a ni a. He project cost ah hian Beneficiary/entrepreneur thlanchhuahte hian 25% tum in state sawrkar in 75% a tumsak a ni. Lengte-Nghalchawm cluster ah hian beneficiary 5 thlan niin heng farm-ah hian belhkhawmin vawk 850 chuang a awm mek a ni.

Chief Minister hi AH & Veterinary Minister Dr. K. Beichhua, Veterinary and Fishery Board Vice Chairman C.Lalmuanpuia leh Mamit bialtu MLA Er. H. Lalzirliana ten an tawiawm a ni.