Aizawl: Chief Minister Pu Zoramthanga chuan Zirtawpni khan Union Minister of Road Transport and Highways Nitin Gadkari leh mi pawi-mawh dangte te chu New Delhi ah Mizoram mamawh te sawipuiin a kawm.

Chief Minister hian Union Minister of Road Transport and Highways chu a chenna inah a kawm a. Aizawl khawpui helna tur kawngpui thar, Sairang - Zemabawk siam chungchang te, Seling - Kawlkulh - Champhai kawngpui thar sial chungchang te, Kawlkulh -Tuivai kawngpui chungchang te, JICA hnuaia kawng thar sial chungchang te, Durtlang Leitan - Sihphir leh Serkhan - Bagha kawngpui siamthat chungchang te leh lei hlui tawh leh chak tawk lo zawng zawng RCC lei a thlak chungchangte a sawi-pui a, Gadkari chuan lo enzui a tiam a ni.

Union Tourism Minister Prahlad Singh Patel chu Mizoram tan Comprehensive Tourism Master Plan siam tur leh Project awm sa North East Circuit at Mizoram chu pawmpui turin Union Minister hi ngen bawk.

CM hian NITI Aayog Vice Chairman Rajiv Kumar chu kawmin Carbon trading chung chang te, National Bamboo Mission hnuaia Bamboo Link Road te an sawi dun bawk.