ZALEN February 7, 2025 : NGO Coordination Committee (NGOCC) Mizoram chuan vawiin chawhnu dar 3 khan Mizoram Chief Minister Lalduhoma chu a Office-ah a hmu a. Cabinet Room-ah inkawmhona hun an nei. Chief Minister hian NGOCC te chu 16th Finance Commission-ah theih ang angin Mizoram sawrkar hmalak tum dan sawipui turin a ngen.

He hunah hian NGOCC chuan, Mizoram in Airport a neih chhun tun hnaia Indian Air Force (IAF) kuta Mizoram sawrkar-in hlan a tum chu ngaihtuah nawn turin Chief Minister a ngen a. "Airport enkawl a hautak avang leh sum lama harsatna sutkianna tura sawrkar hmalaknaah hian Indian Air Force (IAF) kutah hlan mai lovin, kawng dang dap leh hram turin kan ngen che u a ni" an ti.

NGOCC chuan 2024 August ni 9 khan "Lengpui Airport hi IAF kuta hlan hi kan remti lo" tiin thuchhuah a lo siam tawh a. NGOCC Meeting-in a rel angin, vawiin hian Chief Minister hnenah ziakin "Lengpui Airport IAF kutah hlan lo tura ngenna" lehkha a thehlut a. Sawiho nghal a ni.

Mizoram Chief Minister chuan, NGOCC hruaitute hnenah, "Airport hi enkawl a hautak em em a, ram dang anga Airport changtlung leh tha kan duh a nih chuan midang enkawl duh kan zawn a ngai a. Keini chauh hi midang kuta hlan tum kan ni lo. Sawrkar kal tawh zawng zawngte pawhin, Airport enkawl hautak zia an hria a. AAI leh IAF kuta hlan tumin an lo dawr tawh a ni," a ti.

Chief Minister chuan, "16th Finance Commission-ah Airport tih changtlunna tur leh runway thar siamna tur kan dil dawn a. Min phal sak a, kan sum mamawh min pe thei a nih chuan Mizoram sawrkar-in enkawl zui hi kan inhuam reng a ni a ti a. NGO hrang hrangte pawhin 16 Finance Commission-ah theih ang angin Mizoram sawrkar hmalak tum dan hi lo dawra lo sawipui turin ka ngen che u a ni."

"Lengpui Airport hi India ramah state-in a enkawl awmchhun a ni a. Khawi State mahin Airport an enkawl zo lo, Airport Authority of India (AAI) meuh pawhin an Airport enkawl hi Private Company-te hnenah an hlan mek zel a. Keini ang state rethei-in Airport zo leh zo loa kan enkawl hi a hautak hle a, Airport changtlung tak Mizoram-in kan neih hi Sawrkar in kan duh ber a ni," a ti bawk.

NGOCC-ah hian, Central YMA, Mizoram Upa Pawl, Mizo Hmeichhe Insuihkhâwm Pawl, Mizo Zirlai Pawl leh Mizo Students' Union an tel a ni.