ZALEN June 10, 2025 : Chief Minister Lalduhoma chuan tun hma zawnga plastic pipe an hralh thin chu roll khat, roll hniha chhuah thin a nih thu a sawi a, kumthar lamah chuan kuthnathawktute tan plastic pipe a thlawna sem tumin hma an la, tih a sawi.

Mizoram State Water Informatic Centre (Mz-SWIC) nimina IWRD Auditorium, MINECO-a a hawnnaah Lalduhoma chuan pipe man tur hi Agriculture & Farmers Welfare Department leh IWRD Minister PC Vanlalruata hnenah pawh nakumah chuan budget-a dah tura a hrilh tawh a, Crore tam man a nih a rin loh thu a sawi bawk

Chief Minister chuan plastic pipe chungchang hi sawiin, "Kan sawrkar hma zawng kha chuan pipe roll khat hi roll hniha chhuah thin a ni a, tunah chuan pipe roll khat ni na na na roll hniha siam a ni tawh lo. Pipe hi subsidy-a lei tir an ni thin a, mahse, kuthnathawktu ni ve lem lo te pawhin man tlawmin an lei a, manto zawkin an hralh leh thin, a thlawna sem a nih chuan hralhna tur a awm lo ang a, a mamawh te a thlawnin an nei mai dawn a ni," a ti.