ZALEN October 25, 2024 : Vawiin khan Mizo Hnam Runah chhung inkhawm neih a ni a. Political session-a thusawitu R. MNF Gen Hqr. PAC member Lalzirliana, Ex-Minister chuan ram siama politics khel tur chuan politician an tha ber tiin, CM-in sextortion chungchang a sawi chu Zoram tana mualpho thlak a nih thu a sawi bawk.

Zira chuan, "Thalai zawk, mi thiam, mi thar an ti a. Tunah hian kohhran puihnain chutiang mite chuan ram an hruai ta a. Kan beisei an phak lo hle. Politics khel tur chuan politician an tha ber. Politics-ah chuan ram mipuite ban phak tawk hria nih a ngai. Kum naupang zawk leh chak vak zawkte chu an tha teh meuh e. Amaherawhchu, ram siam tur chuan mi puitling, mipuite dinhmun hriaa kalsan lotu nih a ngai,” a ti.

R. Lalzirliana chuan, “CM-in Serchhipa sextortion a sawi kha ka hmuhin ka zak. Pu Lalduhoma chauh kha a mualpho lo. Nenevi challenge nena tawngtai kha mi hur herhten vawi za chuang min phone a ti kha a pawi lutuk, Zoram mipui mualphona a ni."

“Khatiang phone call kha tuten nge dawng ve tawh che u? Minister ka nih ve lai pawhin khatiang kha ka tawng ngai lo. Hetianga mi awm tha duh lote zuam tawk nih hi a serious hle. Engatinge chhui tura an umzui loh?," a ti a. Kha thil kha hnam anga mualphona a tlin thu leh chhui chhuah ngei tul a tih thu Zira chuan a sawi bawk.

Sawrkar kalphung a hmuh dan sawiin, "Tunah hian mipui an beidawng mek a, thil tha lo zawk a hring chhuak ang tih a hlauhawm hle. Lalthutthlenga thut hian kan duh duh ti thei emaw intih a awl thin. ZPM sawrkar hi dan chunga leng, roreltu uchuak tak ang mai niin an chet danah a lang chho zel a. VC-te an thawhpui theih loh avanga an term tihtawisaka vaute hi a dik lo. 'Ration buhfai chungchangah a changtu minister min challenge rawh se,' tihte hi chapona a ni."

“Sawrkar hi sumdawng a ni lova, mipuite harsatna sutkian hi roreltute tih tur a ni a. Kan sawrkar kal tawhte khan mipuite phurrit chhawk zangkhai turin hma an la thin."

“Tuna roreltute kan en chuan, kan CM-in eng nge a sawi? CBI kan ko luh an tiam, consent pawh an pe ngei. Amaherawhchu, a hnu lawkah an hmalaknaah chuan Mizoram sawrkar phalna lo chuan an rawn chhui thei dawn lo. An ekna ngaiah bawk an e leh a ni. Home minister-in thla khat chhungin dan lova thil phurh zawng zawng kan titawp ang a tihte kha khawvel sawrkar advance berte pawhin an tih theih loh a ni."

“Pawisa puk tum lote kha an ni a, mahse finance enkawl thiam intite chuan thla tin an puk tawh. Lal duh luat vanga an thusawite hian a la vaw let mek a ni. Eiruknaah an la fihlim nia an insawite hi a zahthlak. Eiruk tur pawh an la thawk chhuak lo, hna thawk phawt rawh se,” a ti.

Inkhawm kaihruaitu K. Riachho, PAC (MNF Hqr.) pawh thu sawiin, tunhnaiah ZPM sawrkarin PWD thuneihna chhuhsak chu, no confidence ang hiala a ngaih thu leh ni 22.10.2024-a order chhuah chu PWD ni lo dept. dangten works an thawh theihna tura tih a ni a. PWD Minister rin lohna a nih bakah technical person enkawl lohin minister-te hnuaiah hna an thawk dawn tihna a ni, a ti.

MNF sawrkarah Subordinate Staff Selection Board-in fel takin hna a la thin. ZPM sawrkar chuan board thiatin tunah hian DPC-in hna an la a, minister-ten an duh duh an la thei tawh dawn a, Hei hi a fair lo hle a, mipuiten an tuar dawn a ni, a ti bawk.