Aizawl: Chief Minister Zoramthanga chuan nimin zing khan Mawkasiang, Shillong a damlo NEIGRIHMS a inentirte chawlhbuk tur Patients' Lodge sakna tur chu a hmunah tlawhin PWD architect te nen a sak dan tur an enho. Tlai lamah Six Mile, Guwahati ah damlo chawlhbuk tur tho a ruahman Mizoram House extension a en bawk. Guwahati ah hian Lok Sabha MP Pu C. Lalrosanga'n a tawiawm a ni.

Chief Minister chuan Mizoram ah damlo inenkawlna duhthusama a la that tawk loh avangin inenkawlna tha zawk dawng turin mi tam tak state pawnah an kal thin a; Mizoram House chu an tlukluhna ber a nih thin avangin damlote dawl zo zawk turin damlo tam takin an pan thin NEIGRIHMS, Shillong bula Patients' Lodge sa tura ruahmanna siam a nih tur thu sawiin, zin veivak dangte tan pawh a nawm zawk nan Mizoram House hrang hrangte chu a remchan ang zela thawm that leh sak that chu sawrkarin a ngaihpawi mawh thu a sawi.

Patients' Lodge sak tur hi room 40 awm tura ruahman niin, a hmun hi feet 360 x 253 x 270 x 392 a zau a ni a. Enkawltute chenna tur leh tul dangte pawh a remchan dan anga sak belh zel tum a ni. Helai hmun hi March ni 20, 2014 khan Meghalaya sawrkar atangin luah phalna hmuh a ni.

Chief Minister chuan a sak hna tan thuai a nih theih nan a hmalak tur pawimawh te tifel vat turin PWD thawktute a hrilh a ni.

Chief Minister hian Shillong Mizoram House ding mek, Cleve Colony a mikhual hmeichhia 30 leh mipa 30 lenna tur dormitory building sak mek pawh a enfiah a. Deputy Resident Commissioner Mark Lalthanliana chuan a lo dawngsawng a ni.

CM Zoramthanga hian nimin chawhnu khan Guwahati a Mizoram House sak belhna tur hmun chu a tlawh bawk.