Aizawl: Chief Minister Zoramthanga chuan Zirtawpni khan National Highways and Infrastructure Development Corporation Limited (NHIDCL) Mizoram bialtute chu a pisa ah kawmin, Mizoram chhunga an hmalaknate an sawiho.

Chief Minister Pu Zoramthanga chuan Mizoram chu tlang ram, ruah tui tamna hmun a nih avangin state dang, phai ram a hma an lak dan ang ngawt a kal a fuhloh theih thu leh India ram zawng zawng ang khata hrut rual a rem loh thu a hrilh a. India leh Asia chhim chhak ram te inthlunzawmna pawimawh tak state Mizoram chu a nih avangin leh, ram hmasawnna tur hmalakna dang innghahna atan kawng tha leh changtlung tak neih a pawimawh thu a sawi a. Chief Minister chuan NHIDCL chu Mizoram mipuite nen thawhhona tha tak an neih a pawimawh thu sawiin, an hmalaknaah thahnemngai taka theihtawp chhuah turin a chah bawk.

NHIDCL hotute chuan technology thar hmangin tun aia ruahtui dawl thei tur kawng siam an tum thu te, COVID-19 hrileng avanga duh anga an thawh chak theihloh thu te sawiin, Mizoram sawrkarin nena thawhhona tha tak zui zel an duh thu an sawi bawk.