Aizawl August 5, 2022 : MPCC President Lalsawta, chuan, "Pu Lal Thanhawla hi 9th Finance Commission member lo ni tawh a ni a, Finance chungchang a hre êm êm a ni tih hi ziaka record awm se ka duh. A kaihhruaina hnuaia Finance Minister ka nih khan a hahdam êm êm a. Ka thawhpuite Minister leh MLA rual ten dik lo taka thil ti turin min nawr lo bawk a, anmahni avang khan fakte pawh kan hlawh ve phah niin ka hria," a ti. 

Congress sorkar laia Mizoram sum leh pai dinhmun an siamthat dan sawiin, "Pu H. Liansailova Planning-a a awm lai khan ngun takin kan ngaihtuah ho a, kum hnih chhung chu kan ram sum leh pai dinhmun sawhngheh kum, Year of Consolidation-ah kan puang. Ren thei ang berin pawisa kan hmang a, kan ram sum leh pai dinhmun pawh kan ti tha hman viau a ni. Pawisa hmanna kawngah hian hmanhmawh thlak leh hmanhmawk thlak lutuk lo a awm thei. Mi an dam loh chuan an inenkawlna kha a hmanhmawhthlak a, ngaihpawimawh hmasak a ngai a ni. Airport chei thatte pawh hna pawimawh tak a nih rualin hriselna lama hmalakna su buai khawpa hmalak hmasakna atana hman tur a ni lo," a ti.

Sum hnuchhiah chungchang sawiin Lalsawta chuan, "Ram sum leh pai enkawl chungchangah ka uikawm vanga sum hnutchhiah teuh a, MNF-in ren lo taka hmang zui angin an sawi thin a. Mahse, a dik chiah lo. Kan inthlang dawn tih kan hria a, kan tang em em a, kan Minister zawng zawngte pawhin a tam thei ang ber hnathawh an duh a. Chief Minister pawhin instruction fel takin a siam bawk a, pawisa hi kan hmang hman ngei ngei tur a ni, hman lohin a liam tur a ni lo, a ti a. Amaherawhchu, dan anga kal a ngai a, DPR fel taka siam a ngai, Administrative approval leh tul dang tam tak a awm bawk. Dan kalha chet a rem bawk si loh avangin sum hman tak loh kan nei nual a. Tin, inthlan puan hnua Finance Commission atanga lo kal chawp a awm ve zel bawk avangin engemawzat hman ban kan nei lo thei lo a ni," a ti.

Lalsawta chuan, "Congress party hi engtik lai pawhin mi retheite nen inthen thei kan ni lo a, mi rethei zawkte ban phakin kan awm reng tur a ni. Ram kangkang ber berah pawh mi rethei an awm tho ang hian mi retheite hi kan zingah an awm reng dawn a, eng party pawhin sorkarna siam ila, mi rethei buaipui ngai an awm reng ang. Mi rethei zawkten khaw eng an hmuh theihna tur hian Congress Party chuan Pathian hruaina ringin kan thawk zel dawn a ni," a ti.

August 5, 2022 hian Congress Bhavan, Aizawlah Friday Political Session neih a ni a. Political Session hi R. Vanlalvena, Ex MLA & Gen. Secy, MPCC-in a kaihruai a, report hrang hrang ngaihthlak a nih bakah Lalsawta, President, MPCC chuan mi thar pahnih lawmluh a ni bawk.