Aizawl : MPCC chuan nimin khan thuchhuah siamin COVID-19 hripui leng avangin Mizoramin hun harsa tak a tawh mek a, COVID-19 vei mi 3500 chuang zingah chhungkaw tam takin harsatna an tawh phah a. Lockdown vawi tam tak kalpui a nih tawh avangin chhungkaw tam tak eizawnnain a tuar nasa hle a, sum leh pai harsatna nasa tak a thleng chho mek a ni. tiin CM Relief Fund chu tangkai taka hman turin sawrkar an ngen.

Congress chuan sorkar hnathawk Association hrang hrang te, NGO-te, Kohhran leh mi mal inpe tak tak ten Chief Minister's Relief Fund for COVID-19 ah pawisa Vaibelchhe 22 chuang an thawhkhawm tawh a. Heng pawisate hi a hming ang tak hian harsatna tawkte chhawmdawl (relief)-na tur a ni a, COVID-19 vanga harsatna tawkte tanpuina atana thawhkhawm a ni, tiin, “Tuna CM Relief Fund vaibelchhe eng emaw zat awm mek hi COVID-19 vei mekte enkawl nan te, Lockdown avanga eizawnna chhiat phah ta chhungkaw tam tak tanpui nante a rang thei ang bera hman nise tih hi Congress Party duh dan a ni,” an ti.

COVID-19 avanga Mizoramin hun khirh tak a tawn laia CM Relief Fund hman a nih danah Mizoram mipui an lung a awi lo niin an tarlang a, harsatna tawk mipuite tanpuina atana hmang lo a, sorkar insensona tur awm ngawih ngawiha ngaih khawl leh Test Kit lei nana CM Relief Fund vaibelchhe tam tak hman a nih avangin mipuiin CM Relief Fund-ah pawisa an chhunglut tha duh tawh lo, niin an sawi.

CM Relief Fund chu kum engemawzat kalpui a lo ni tawh, tiin Cancer leh natna khirhkhan bik vei te, leimin leh chhiatna dang thleng avanga harsatna tawk mi za tam tak tanpui nan hman a lo ni tawh thin a, sorkar bungrua tur lei nan, sorkar tanpui nan hman a la ni ngai lo. Chuvangin, tunah pawh hian ‘CM Relief Fund for COVID-19’ hi COVID-19 veite leh a kaihhnawih lockdown vanga harsatna tawkte tanpui nan a tangkai thei ang bera hman nghal chu Congress Party duh dan a nih thu an tar lang.