Aizawl: ZPM Leader Lalduhoma'n Pathian leh mipui zarah an sawrkar a nih chuan Lok Ayukta an ti chak dawn ti sawiin, chief minister thlenga chhui theiin an siam dawn tih a sawi.            

Hrangturzo constituency huam chhunga khaw hrang hrang a fan kualna, Leng, Sailulak leh Mualcheng khua te a vantlang inkhawm neihah thusawiin Lalduhoma chuan, India ramah state tlemte CBI ko lut ngam lo an awm tih sawiin, chung zingah chuan Mizoram a tel thu leh Pathian zarah an sawrkar chuan CBI an koh luh tur thu a sawi.

An sawrkar atanga ni 100 chhungin kan ram hmelhmang thlak an tum tih sawi bawkin, ZPM Leader chuan mipui mimir ten politician an thlir dan chu thlak danglam theih an inbeisei tih a sawi. "MLA fund te hi dik taka hman chuan bial chhung tan hmasawnna tam tak a thlen theih a, opposition MLA ni chung pawh hian thil tam tak a thawh theih a ni," a ti.

"Vawiinah hian politician kan nih vang ringawtin party a kan awm a tha tawh lova, ringtu kan nihna avang hian party-ah kan awm a ngai," ti bawkin, "Kohhranin a duh loh, nasa taka a do policy zuartute party a rawngbawltu kan la awm te hi kan tih hauh loh tur a ni," a ti bawk.