31.3.2022; Chief minister social media kaltlang a bang tur nawrtu leh thah a vautu a ngaih mi pahnih man an nih hnuah, March 17, 2022 khan RD minister Lalruatkima social media kaltlang a puh hmingchhetu a puh mi pakhat police ten an man leh a, an pathum hian dan ang thlapin bail a chhuah lailawk rih an ni.

ZALEN thudawn danin, CM vautu a puh mi pahnih te thubuai chu ngaihtuah chhunzawm zel tur a ni a, hetihlai hian RD minister dawt a puh chungchang thubuai chu FIR thehluh dan a dik tawk loh vangin revoke (sut) theih a ni a, dan anga court a thubuai kalpui tur chuan a hranpa a thubuai thehluh that theih a ni ang. 

Media hrang hranga tarlan tawh angin, social media a CM Zoramthanga thla thum chhunga bang tura nawrna leh a ban loh chuan thah a vautu a puh chu man anih hnuah, a thu rualpui nia hriat chu March ni 13, 2022 zan khan Serkawnah man a ni ve leh a ni.

Heng thil thlen hnu March ni 16, 2022 khan MNF chuan, social media (facebook)-ah dawta minister Lalruatkima puh hmingchhetua an ngaih lakah cyber crime police station-ah FIR an thehlut a. Hemi ang hian March 17, 2022 ah police ten manin, IPC section 500 hmangin thubuai an siamsak.

MNF party thuchhuah tarlan danin, facebook group pakhata comment a siamah, minister Lalruatkima chu, 'Chamdur ramngawa sanctuary-a mi Sele a kahtir,' tiin a tarlang a ni.