ZALEN July 25, 2023 : All NGO Coordination Committee-in 'Manipur Zohnathlak Unaute Thlavang Hauhna Kawngzawh / Solidarity March in Support of Zo Ethnic Tribe of Manipur' an buatsaih-a tel Chief Minister Zoramthanga chuan kawngzawh huaihawt a ni chu lawmawm a tih thu a sawi a, Manipur Zohnathlak te leh raltlante tan Central-ah theih tawpin nawr chhunzawm zel an tum thu a sawi.

Kawngzawh inkhawm zawh a nih hnua Chanchinthar thehdarhtu ten an kawmnaah Zoramthanga chuan hlawhtling taka All NGO te hun anhaihawt chu lawmawm a tih thu leh an thlawp thu a sawi. Raltlante theihtawpa lo tanpui chu an tih tur hmasa a ni a ti a. India sawrkar leh Manipur sawrkarin buaina hi a chinfel theihna tura sawrkar laipui nawr chu a pahnihna a nih thu a sawi. Hemi atan hian Manipur leh central sawrkar hian mamawhna an nei a nih chuan theihtawp an chhuah tur thu a sawi bawk.

Central sawrkarin Manipur raltlante tanpuina tur cheng vaibelchhe 10 Mizoram sawrkar an pek tur an la pek loh chungchangah theihtawp chhuah zel an tum a, India sawrkar pawhin hei hi an tih thuai a rinthu leh Manipur leh state dangah pawh central hian tanpuina hi pek an tum nia a hriat thu a sawi bawk.

Mizoram sawrkar duhdan angin Manipur leh central sawrkar hian inremna nei thei ta lo se, engtiangin nge hma an lak ang tih zawhna chu Chief Minister chuan theihtawp a chhuah tur thu a sawi a, buaina a reh theihna atana a tawp thlenga hmalak chu an tih tur a ni, a ti.

NDA an zawm chungchanga zawhna chu Zoramthanga chuan dinhmun tawn ang zela danglam thei a nih thu a sawi a, NDA an zawm avanga an thu leh hla zawm vek tur an nih loh thu sawiin, Mizote tana tha tur chu an dah pawimawh ber tih a sawi bawk.