Aizawl January 31, 2023 : Aizawl City College Joint Students Union (ACCJSU) te chuan Kumtin Civil Service Examination neih a nih laia College Professsor te hna lak belh a awm tawh lo chu pawi an tih thu leh zirlaite tan hmasawnna daltu pakhat a ni, an ti a, College zirtirtu hna hnawhkhah loh a tam hle niin an sawi bawk.

ACCJSU chuan RUSA hnuaia MPSC-in College zirtirtu tur a lak mi 74 te chu lak atanga kum hnih hnuah Mizoram sawrkar hnuaiah a ngheta lak tur a nih laiin tun thleng hian a ngheta lak an la ni lo an ti a, tam tak chuan an dinhmun chu him tawk lovah an ngai a, chuvang an bang then a, tunah hian 59 chiah an thawk tawh an ti a, college zirtirtu hna hnawhkhah loh 189 a awm niin an sawi bawk.

College zirlai intelkhawm te chuan College-a zirtirtu chanve deuh thawh chu College pawisa a chhawl leh contract a thawkte an ni a, heng contract leh college pawisa a chhawr te hi thalai fit tak tak te an ni a, an thiamna leh qualification-in a tlin chuan a ngheta lak theih ni se an duh.

Congress sawrkar lai khan College 4-ah Psychology subject hawn belh tur a nih laiin hna lak Professor an awm loh avangin tun thleng he subject hi hawn belh a ni ta lo a ni, an ti bawk.