February 7, 2024; Vawiin khan Commissioner for Persons with Disabilities (PwD) Office chuan, a vawi khatna atan Mizoram Combined Competitive Examinations 2023 a PwD quota a tling mi 3 te lawmpuina hun an hmang.

PwD office chuan heng mite Lalngaihawmi (MCS), Lalremtluanga (MF&AS) leh N. Vahneichhi (MIS) te a lawmpuiin a ngaihlu em em a, an puala lawmpuina hun hman hi an phu hle in a hria. Harsatna tam tak kara bei chho a, hlawhtlinna sang tak an hmu chu chhuangin, midang tam tak rualban lohna nei te pawhin heng dinhmun hi an luah ve thei a ni tih hi hria se a duh.

Mizoram sawrkar chuan hna a lak reng rengin 4% aia tlem lo reservation a dah thin a, Mizoram sawrkar hnuaiah mi thahnem takin PwD quota in sawrkar hna an hmu tawh a, Group A, B, C leh D thlengin mi 90 aia tam an lut tawh.

Vawiin hun hmanna Aizawl Press Club ah hian Lalngaihawmi (MCS) leh Lalremtluanga (MF&AS) te an tel a, N. Vahneichhi (MIS) erawh thil tul dang pawimawh a neih vangin a tel thei lo.