Aizawl : Nimin khan MNF party chuan AMC Election Manifesto leh MNF Party website tlangzarh na a nei a, he huna thusawitu MNF Pesident leh Chief Minister ni bawk Zoramthanga chuan, Congress party chu an tluchhe vek tawh a, ZPM pawh an original size tiat lek an ni tih a sawi.

MNF President Zoramthanga chuan, “AMC inthlan hi a naran lo, Mizoram mipui hmun thuma thena hmun khat awmna leh mi thiam zawk awmkhawmna a nih avangin election lo awm tur hi a pawimawh em em a ni,” a ti a. Aizawl Municipal Corporation chu a tirah municipal council tiin MNF-in bul an tih a sawi a, “Keini hi a neitu kan ni a, mi dangte chu vai party lo pem lut an ni. Keini chuan a takin hna kan thawk ang. Sorkarna siam ngei pawh kan inring,” a ti.

Congress chungchang sawiin, “Engatinge Congress hi an chhiat tak, President pawh thlang thei lovin an awm. An President rei ber chu Sonia Gandhi a ni. Ani kha Kristian a ni a, a fapa Rahula tan lord krishna hnenah malsawmna a dil a. A kaihhruai lai ngeiin Congress chu an chhe ta vek a. He lamah pawh zu an zawrh avangin tundin leh ngaihna a awm tawh lo,” a ti.

ZPM chung chang sawiin MNF president chuan, “AMC inthlana chak kan inrin chhan chu MLA 2018 inthlanah thawm na ber chu ZPM an ni. ‘Keini chu kohhran thawhpui leh kohhran hi kan unit,’ an ti. Sorkar siam an inrin avangin Chief Ministerial candidate hial an nei a nih kha. MNF leh Congress ten chief minister candidate kan nei ve ngai lo. Anni chu CM candidate tiin an inhampuar a, mipui thenkhat pawhin tak tak emaw an ti.”

MLA inthlan result a lo chhuah meuh chuan MLA 8 an nei a (tunah 7). CM Candidate kha khawiah nge? VC/LC, autonomous district council -ah MNF kan chak em em a. LADC ah phei chuan ZPM-in seat an la lo mai pawh a ni lo, an chuh ve ngam lo hrim hrim. Mipui hian an hrechiang tawh em em, party zuih turte chu an zuih telh telh a nih hi. AMC inthlan tur kan en hian MNF kan sorkar ngei kan ring a ni,” a ti.

A sawi zelnaah Zoramthanga chuan, “An hruaitute chu inthlan dawn apianga symbol thlak ngai an ni a. CM Candidate, Secretary General, Val Upa Council, General Secretary neiin, OB chungah Leader nen inkulh rup mah sela, baloon hampuar hawlh thep ang maiin an original size tiat lekah an lo awm ta a, thli beng lohna lama lehkha chaih tum ang chauh an ni,” a ti bawk.