Aizawl: MNF party chuan Congress-in tih tur hre loin an hnapui ber sawisel tur dap an la chhunzawm zel niin an sawi.

Nimina thuchhuah an siamah MNF party chuan Covid 19 do nan party hrang hrang MLA-ten CM Relief Fund-ah an thlabi hlawh atang leh an MLA Fund atangin sum an chhunglut chur chur a, chutih laiin Congress Legislature Party member-te chuan 20.5.2020 khan Rs.4,00,000/- chauh an pe ve hram a. Heti chung hian Congress-ho chuan timna, inthlahrunna neilo leh zah nachang pawh hre chuang lovin an hnapui ber 'sawisel tur lo dap' chu an la chhunzawm zel a, an sawi ve ber an MLA pakhatin Lungleia RT-PCR a lei ve lah chu a leitu berin a lei chhan sawiin 'MNF tan hling kan siam a ni mai, ti hian lo awm tawl mai mai mahse a pawi lo' a la tizui niin an sawi.

MNF thuchhuah chuan Congress-hoin an thuchhuaha Health Minister-in Covid-19 hri inkaichhawnna (Transmission Chain) chhut chah a ni tawh tih an rawn tarlan kha thil awmzia man loh vang zawk a ni tiin, Khawvel ram ropui tak takah pawh he hri hi a changin a ziaawm hret a, a chang leh a rawn pung leh hluai thin a, a hnuah a rawn awm leh zel thin. Health Minister khan tlema kan ziaawm lai thu a rawn sawi kha a ni mai a, transmission chain chhut chah tih hi chu thil theih loh a ni.

India ram State hrang hrang Covid 19 donaah Mizoram chu titha ber kan la ni mek tih sawiin, Health Minister-in Chief Minister rawn chung zel leh a remtihpuina zelin hma chak takin a la zung zung a, ruahmanna a siam zung zung zel bawk a, chungte chu medical lama thawktu mithiam rualin inpezo tak leh lungrualin an bawhzui zung zung zel bawk a. Chuvang chuan Covid 19 donaah tun dinhmuna ding thei kan ni, an ti a. Hripui leng chungchang hi Mizoram pumin kan buaipui leh kan ngaihven reng a nih avangin hmalak dan te, kan dinhmun te, kal zel dan tur puanzarte leh mipuite thlamuanna thuchah sawite hi Chief Minister, Health Minister, Minister dangte leh MLA-te hian an tih chhunzawm zat tur a ni a, intihlar tumna lam a ni lo a ni, an ti bawk.