Aizawl August 2, 2022 : Mizoram Pradesh Congress Committee (MPCC) chuan, July thla chhunga SEDP sem a nih tur thu sawitu Dy CM Tawnluia’n thupha chawi rawh se, an ti a, MNF Party chhungah leh thingtlang kuthnathawktu rethei tak tak te rilruah beiseina sang tak a siam a, SEDP tanpuina Rs. 50,000/- dawn mai inbeisei chhungkaw sang tam tak an awm a ni, a ti

Vawiina thuthar lakhawmtu te Aizawl Press Club-a an kawm naah MPCC chuan, June 28, 2022 khan Tawnluia, Dy Chief Minister chuan Khawhai Town Hall-a Tuichang South Block MNF Conference a hmanpuinaah, chhungkaw sing 6 hnenah SEDP tanpuina Rs. 50,000/- zel pek a nih tur thu a sawi, tiin, “July 2022 chhungin DC tin atangin pawisa an semchhuak thei tawh turah ka ngai,” a ti, an ti. Congress chuan, MNF Party chhungah leh thingtlang kuthnathawktu rethei tak tak te rilruah beiseina sang tak a siamsak a, July thla chhung ngeia SEDP tanpuina Rs. 50,000/- dawn mai inbeisei chhungkaw sang tam tak an awm hman a ni, an ti.

Congress chuan, July thla a liam a, vawiin August ni 2, 2022 thleng hian SEDP tanpuina dawngtu chhungkua sawi tur pakhatmah an la awm ta chuang lo. Dy. CM Tawnluia’n  July thla chhunga pekchhuah hman a nih tur thu Tuichang bial mipuite leh Mizoram mipuite beiseina sang tak a siamsak chu beiseina lem mai a ni tih a chiang leh ta a ni, an ti bawk. 

Kum 2018-a ZONET-in Inthlan thlirlawkna a buatsaih tum khan Pu Zoramthanga chuan SEDP cheng nuai 3 sem a harsat loh tur thu chiang takin a lo sawi tawh bawk tiin, Congress chuan, “Kum 5 chhung, term khat project a ni a, kum tin Rs. 60,000/- a nia, thla tin  Rs. 5000/- a ni mai a. MR hlawh pawh a zat lo a, thil harsa tur a ni lo,” a ti a. Mahse, kum 3 leh a chanve chuang an sorkar hnu pawha SEDP dawng chhungkaw pakhat pawh sawi tur an la awm lo hi hriatthiam theih a ni lo, an ti.